‘चला हवा येऊ द्या’ फेम मराठी अभिनेता कुशल बद्रिके हा पडद्यावर जितका विनोदी आहे, तितकाच तो त्याच्या खऱ्या आयुष्यातदेखील गंमतीशीर आहे. त्याच्या या विनोदी स्वभावाचा प्रत्यय वेळोवेळी आलाच आहे. ‘चला हवा येऊ द्या’ या लोकप्रिय कार्यक्रमाच्या माध्यमातून कुशल अवघ्या महाराष्ट्रात लोकप्रिय झाला. या शोमधून विनोदी स्किट्स करत त्याने चाहत्यांचे चांगलेच मनोरंजन केले आहे. कुशल हा सोशल मीडियावर चांगलाच सक्रिय असतो. सोशल मीडियावर तो त्याचे अनेक फोटो व व्हिडीओ शेअर करत असतो. या फोटो किंवा व्हिडीओखखालील कुशलचे कॅप्शन्सही प्रेक्षकांचे लक्ष वेधून घेतात.
कुशलचा सुनयनाबरोबर प्रेमविवाह झाला असून त्यांच्यात नवरा-बायकोपेक्षा मित्र-मैत्रिणीचे नाते असल्याचे कायमचं पाहायला मिळाले आहे आणि हे खास नाते त्यांच्या अनेक फोटो किंवा व्हिडीओमधून पाहायला मिळतं. कुशल आपल्या पत्नीबरोबरचे अनेक फोटो व व्हिडीओ सोशल मीडियावर शेअर करत असतो. अशातच त्याने नुकताच एक फोटो शेअर केला आहे. या फोटोमध्ये त्याच्या घरात सगळीकडे अस्ताव्यस्त कपडे पडलेले दिसत आहेत आणि या अस्ताव्यस्त कपड्यांमध्ये कुशल उभा आहे. या फोटोखाली लिहिलेल्या हटके कॅप्शनने सर्वांचे लक्ष वेधलं आहे.
आणखी वाचा – Video : अंबानींनाही पडली पारंपरिक कोळीगीतांची भुरळ, रिसेप्शन सोहळ्यात घुमले मराठमोळे सुर, व्हिडीओ व्हायरल
या फोटोखाली कुशलने असं म्हटलं आहे की, “आपलं स्वतःचं घर झालं की, त्यातली एक खोली आपण ‘कलेसाठी’ समर्पित करायची, जिथे ‘कलेची’ जोपासना झाली पाहिजे. हे आमच्या दोघांचंही स्वप्न होतं आणि आज एका छोट्याश्या डिस्कशननंतर माझ्या बायकोने मला पटवून दिलं की. पावसाळ्यात कपडे वाळवणं ही सुद्धा एक ‘कलाच’ आहे. आम्ही प्रेमाने घेतलेल्या घराच्या ‘खोलीचा’ पुरेपूर वापर झाल्याचं समाधान माझ्या चेहऱ्यावर आहे”.
यापुढे त्याने असं म्हटलं आहे की, “अजूनही माझ्या प्रेमात किती ‘खोली’ आहे हे मी हिला (पत्नीला) दाखवलं असतं. पण जाऊदे. पावसाळा आहे आणि वॉशिंग मशीनला कपड्यांचा एक लॉट अजून लावलेला आहे. अन्न, वस्त्र, निवारा या माणसाच्या मूलभूत गरजा पावसाळ्यात अन्न, वस्त्र आणि वारा होऊन बसतात. असा नवीन शोध आज मला लागला”. यापुढे त्याने एक खास तळटीपही लिहिली आहे. यात त्याने असं म्हटलं आहे की, “आमच्या त्या छोट्याश्या सांभाषणानंतर माझ्या असं लक्षात आलं की, कथ्थक नाचणाऱ्या मुलींचा पाया आणि पाय दोन्ही खूप मजबूत असतात. आता माझी कंबर बरी आहे काळजी नसावी”.
