Prasad Jawade Mother Passed Away: मराठी मनोरंजनविश्वातून नुकतीच एक दुःखद बातमी समोर आली आहे. ‘झी मराठी’ वाहिनीवरील लोकप्रिय मालिका ‘पारू’ या मालिकेतील आदित्यची भूमिका साकारणारा सुप्रसिद्ध अभिनेता प्रसाद जवादे याच्या आईचं निधन झालं आहे. वयाच्या ६५व्या वर्षी त्यांनी अखेरचा श्वास घेतला. प्रसादची पत्नी अभिनेत्री अमृता देशमुखने त्यांच्या निधनाची बातमी सोशल मीडियाद्वारे दिली. प्रज्ञा जवादे गेल्या काही काळापासून कर्करोगाशी झुंज देत होत्या. अखेर त्यांची ही कॅन्सरशी झुंज अपयशी ठरली.
अमृताने सोशल मीडियावर ही दुःखद बातमी शेअर करत लिहिलं, “कळवण्यास अत्यंत दुःख होत आहे की, प्रसादची आई प्रज्ञा जवादे यांचं २८ डिसेंबर २०२५ रोजी वयाच्या ६५ व्या वर्षी निधन झालं. कर्करोगासारख्या गंभीर आजाराशी त्यांनी अपार धैर्य आणि सकारात्मकतेने लढा दिला. त्या अत्यंत प्रेमळ, शांत आणि कुटुंबाला एकत्र ठेवणाऱ्या व्यक्तिमत्त्वाच्या होत्या. त्यांची आठवण सदैव आमच्या हृदयात राहील.” “मम्मी आम्हा सर्वांना तुमची खूप आठवण येत आहे. असं देखील तिने या पोस्टमध्ये लिहिलं.” (Prasad Jawade Mother Passed Away)
दरम्यान काही महिन्यांपूर्वी पार पडलेल्या ‘झी मराठी’ पुरस्कार सोहळ्यात प्रसादला ‘सर्वोत्कृष्ट मुलगा’ हा पुरस्कार मिळाला होता, तेव्हा त्याच्या आईने आजारपणातही तिथे उपस्थिती लावली होती. यावेळी प्रसादच्या आईला गेल्यावर्षी कॅन्सरचे निदान झाल्याचं समोर आलं. मात्र, या कठीण काळात ही प्रसादने न खचता आईची सेवा आणि मालिकेचं शूटिंग उत्तमरीत्या पार पाडलं होत. दरम्यान आता प्रसाद जवादेला मातृशोक झाला असून संपूर्ण मराठी मनोरंजनविश्वातून हळहळ व्यक्त केली जात आहे. (Prasad Jawade Mother Passed Away)
