Ajit Pawar Passes Away : महाराष्ट्राचे उपमुख्यमंत्री अजित पवार यांचे विमान अपघातादरम्यान निधन झाले आहे. अजित पवार हे मुंबईहून बारामती विमानाने प्रवास करत होते. विमान लँडिंग आधी बरामती विमानतळाजवळील एक शेतात कोसळले. यादरम्यान अजित पवार यांचे भीषण अपघातात निधन झाले. तसेच त्यांच्या निधनाने संपूर्ण महाराष्ट्र हादरला आहे. इतकंच नव्हे तर संपूर्ण मराठी मनोरंजनसृष्टीतून अजित पवारांच्या निधनानंतर शोक व्यक्त केला जात आहे. तर अजित पवार यांच्या निधनानंतर डॉ. अमोल कोल्हे यांनी सोशल मीडियावर पोस्ट शेअर करत अजित पवारांना श्रद्धांजली वाहिली आहे.
अजित पवार यांच्या निधनानंतर डॉ. अमोल कोल्हेंनी पोस्ट करत लिहिलं, “महाराष्ट्राचे उपमुख्यमंत्री, संपूर्ण राज्याचे लाडके आणि हक्काचे दादा मा. अजितदादा पवार यांच्या दुर्दैवी निधनाची बातमी अतिशय क्लेशदायक आहे. खरतर अजूनही विश्वास बसत नाही की अजित दादा आता आपल्यात नाहीत. संपूर्ण महाराष्ट्राने आज एक उत्तम प्रशासक, शिस्तशील नेतृत्व आणि जनतेसाठी भल्या पहाटेपासूनच काम करणारा हक्काचा माणूस गमावला आहे. आज फक्त बारामतीकरच नव्हे तर राज्यातील प्रत्येक सर्वसामान्याच्या डोळ्यात अश्रू आहेत आणि सोबतच पोरकेपणाची भावना आहे.” असं लिहीत अमोल कोल्हे यांनी आपल्या भावना व्यक्त केल्या आहेत. (Ajit Pawar Passes Away)
यासोबतच मराठी मनोरंजनसृष्टीतील इतर कलाकारांनी देखील सोशल मीडियावर भावुक पोस्ट शेर करत अजित पवार यांना श्रद्धांजली वाहिली आहे. सुबोध भावे, मेघ धाडे, सायली संजीव, मंगेश देसाई, हेमंत ढोमे, सूरज चव्हाण, रितेश देशमुख, तेजश्री प्रधान, अंकिता वालावलकर, आदेश बांदेकर, अजिंक्य देव यांसारख्या अनेक कलाकारांनी अजित पवार यांना श्रद्धांजली वाहत दुःख व्यक्त केलं आहे. (Ajit Pawar Passes Away)
