‘कलर्स मराठी’ वाहिनीवरील संत बाळूमामा यांच्या जीवनावर आधारित मालिका प्रेक्षकांचे मनोरंजन करत आहे. अल्पावधीत ही मालिका लोकप्रियतेच्या शिखरावर पोहोचली. या मालिकेचा प्रेक्षकवर्ग खूप मोठा असून अनेक प्रेक्षक ही मालिका आवडीने पाहत आहेत. नुकताच या मालिकेचा नवीन अध्याय सुरु झाला आणि या नवीन अध्यायात बाळूमामांच्या भूमिकेत अभिनेते प्रकाश धोत्रे यांनी बाळूमामांची भूमिका साकारली.
या मालिकेत गेले साडे पाच वर्षांहून अधिक काळ बाळूमामांच्या भूमिकेत अभिनेता सुमीत पुसावळे पाहायला मिळत होता. त्यानंतर प्रकाश धोत्रे बाळूमामांच्या भूमिकेत पाहायला मिळत आहेत. नुकतेच या मालिकेचे ८०० भाग पूर्ण झाले आणि याचनिमित्ताने ‘इट्स मज्जा’ने प्रकाश धोत्रेंशी संवाद साधला, यावेळी त्यांनी त्यांना आलेल्या अनुभवाविषयी सांगितले.
या अनुभवाचे कथन करताना त्यांनी असं म्हटलं की, “मी आता आदमापूरला जेव्हा गेलो होतो. तेव्हा साहजिकच मास्क लावून गेलो होतो. आणि मला विशेष व्यवस्था करून देवदर्शन करणे आवडत नाही. तर दर्शन घेत असताना प्रचंड गर्दी होती. पण त्या परिसरात मला बाळूमामा म्हणून अनेकजण ओळखतात. तेव्हा एक गृहस्थ होते त्यांना कदाचित बोलता येत नव्हते. तर ते जवळ आले आणि त्यांनी माझे हात हातात घेतले आणि ते काहीही बोलत नव्हते. त्यांच्या डोळयांतून फक्त पाणी वाहत होते. तर त्यांनी त्यांच्या अगदी जुन्या मोबाईलमध्ये फक्त माझाच फोटो काढला”.
यापुढे त्यांनी असं म्हटलं की, “त्यानंतर मी दर्शनच्या रांगेत उभा असताना आणखी एक गृहस्थ आले आणि त्यांनी माझ्याकडे बघून मला बाळूमामा असं म्हटलं. यावर मी त्यांना “नाही मी बाळूमामा नाही. मी फक्त त्यांची भूमिका करतो” असं म्हटलं. यावर त्यांनी असं म्हटलं की, “आज मामांचे दर्शन माझी घेण्याची इच्छा होती आणि मनापासून असं वाटत होते की, तुमची भेट व्हावी आणि योगायोगाने तुम्हीदेखील भेटलात”.
आणखी वाचा – नागराज मंजुळेंच्या ‘मटका किंग’मध्ये सई ताम्हणकरची वर्णी, महत्त्वपूर्ण भूमिकेत दिसणार
दरम्यान, प्रकाश धोत्रे यापूर्वी ‘सुंदरा मनामध्ये भरली’ या मालिकेत पाहायला मिळाले होते. या मालिकेत त्यांनी लतिकाच्या सासऱ्यांची भूमिका म्हणजेच आप्पा जहागीरदार साकारले होते. त्यांनी आजवर अनेक चित्रपट तसेच अनेक मालिकांमधून काम केलं आहे. याशिवाय बऱ्याच नाटकांमध्येही प्रकाश धोत्रे झळकले आहेत.
