अभिनेत्री प्रियांका चोप्रा नेहमीच कोणत्या ना कोणत्या कारणामुळे चर्चेत असते. लग्नानंतर प्रियांका चोप्रा परदेशात स्थायिक झाली आहे. बरेचदा अभिनेत्री तिच्या वैयक्तिक तसेच कौटुंबिक कारणामुळे चर्चेत असलेली पाहायला मिळाली आहे. अशातच प्रियांका चोप्राच्या सासरच्या कुटुंबातील एका व्यक्तीबाबत खूप मोठी बातमी समोर आली आहे. प्रियांका चोप्राचा दीर आणि निक जोनासचा भाऊ केविन जोनास याला कॅन्सर हा आजार झाला असल्याचे समोर आले आहे. केविन त्वचेच्या कर्करोगाशी झुंज देत असल्याचं समोर आलं आहे. (Kevin Jonas Diagnosed With Skin Cancer)
केविनने स्वतः इन्स्टाग्राम अकाउंटवर एक व्हिडीओ शेअर करत याबाबतची माहिती दिली आहे. याबरोबर त्याने चाहत्यांना खास आवाहनही केले आहे. केविन जोनासने हॉस्पिटलमधील स्वतःचा एक व्हिडीओ शेअर केला आहे. ज्यामध्ये तो त्याच्या जखमेवर उपचार करताना दिसत आहे. या व्हिडीओमध्ये तो असं बोलताना दिसत आहे की, “म्हणून आज मी माझ्या डोक्यातून बेसल सेल कार्सिनोमा काढत आहे. होय, हा खरं तर त्वचेचा लहान कर्करोग आहे जो वाढू लागला आहे. त्यामुळे ते काढण्यासाठी मला शस्त्रक्रिया करावी लागली”.’
शस्त्रक्रियेनंतर घरी जाताना केविनने त्याच्या कारमधून एक व्हिडीओ शेअर केला आहे. त्याच्या कपाळावर शस्त्रक्रियेचे डाग बँडएडने झाकलेले दिसत आहेत. केविनने चाहत्यांना त्यांच्या आरोग्याची काळजी घेण्यास आणि त्यांच्या त्वचेची चाचणी घेण्यास सांगितले. त्याचा हा व्हिडीओ शेअर करत केनिन जोनासने कॅप्शनमध्ये लिहिले आहे की, “तुमच्या त्वचेची चाचणी घेण्यासाठी एक मैत्रीपूर्ण सल्ला देत आहे”.
केविन जोनास निक जोनास व जो जोनास या भावांसह स्वतःचा म्युझिक बँड चालवतात. तो अनेकदा आपल्या भावांसह लाइव्ह कॉन्सर्टमध्ये परफॉर्म करताना दिसतो. केविनच्या वैयक्तिक आयुष्याबद्दल बोलायचे झाले तर त्याने १५ वर्षांपूर्वी डॅनियल जोनासशी लग्न केले होते. केविन व डॅनियलच्या दोन मुली आहेत. एलेना रोज आणि व्हॅलेंटिना अँजेलिना अशी त्यांची नावे आहेत. केविन अनेकदा आपल्या मुलींबरोबरचे फोटो सोशल मीडियावर पोस्ट करत असतो.