‘बिग बॉस मराठी’मधून घराघरांत लोकप्रिय झालेला गायक, संगीतकार व अभिनेता म्हणजे उत्कर्ष शिंदे. उत्कर्षने आजवर आपल्या गाण्यामुळे, अभिनयामुळे व त्याच्या खास लेखनशैलीने सर्वांच्याच मनात स्थान निर्माण केलं आहे. उत्कर्ष हा सोशल मीडियावर चांगलाच सक्रिय असतो. त्याचे अनेक फोटो व कामाबद्दलची माहिती तो सोशल मीडियाद्वारे चाहत्यांबरोबर शेअर करत असतो. अशातच त्याने आपल्या बहिणीबद्दलचा एक खास व्हिडीओ शेअर केला आहे.
नुकतेच उत्कर्ष शिंदेच्या बहिणीचे लग्न झाले असून उत्कर्षने आपल्या बहिणीबद्दल एक खास पोस्ट शेयर केली आहे. या पोस्टमध्ये उत्कर्षने बहिणीचे कौतुक करत असं म्हटलं आहे की, “दहा भावांची एक बहीण. कर्तृत्ववान, सहनशील, समजूतदार, मायाळू, लहानपणापासून सगळ्याना जीव लावणारी आमची ‘ताई’. लग्नात हजारो शुभचिंतक जरी होते तरी आमची काकू ज्योती मिलिंद शिंदे यांची खूप आठवण आली. कोरोनामध्ये ती आम्हा सर्वांना सोडून गेली. काकूनंतर सर्वात लहान असून ताईने आईची जागा घेत भावांना व काकाला प्रेमाने सांभाळल”.
यापुढे त्याने असं म्हटलं आहे की, “खऱ्या अर्थाने भावांचं नाक उंच ठेवणारी आमची ताई. सक्षम, संवेदनशील, परिपक्व विचारांची आमची मैत्रीण, काकू तरी कधी आमच्या आजीचं रुप घेणारी आमची ताई. तिच्या पुढील आयुष्यासाठी खूप खूप शुभेच्छा. ताई कधीच टेन्शन घेऊ नकोस तुझे भाऊ नेहमी तुझ्याबरोबर आहेत.” उत्कर्षने शेअर केलेल्या या व्हिडीओमध्ये संपूर्ण शिंदे घराणे दिसत आहे. उत्कर्ष व आदर्श शिंदे यांच्यासह त्यांचे भावंडेही दिसत आहेत.
दरम्यान, उत्कर्षने शेअर केलेल्या या व्हिडीओला अनेक चाहत्यांनी लाईक्स व कमेंट्स करत चांगलाच प्रतिसाद दिला आहे. या व्हिडीओखाली त्यांच्या अनेक चाहत्यांनी १० भावांची बहीण ताई नशीबवान आहे”, “किती गोड”, खूपच छान”, अशा अनेक कमेंट्सद्वारे अनेकांनी उत्कर्षच्या बहिणीला तिच्या लग्नानिमित्त अभिनंदन व शुभेच्छाही दिल्या आहेत.