लोकसभा निवडणुकीच्या एकूण सात टप्प्यांपैकी चार टप्प्यांमधील मतदान पार पडलं आहे. आता पाचव्या टप्प्यासाठी येत्या २० मे रोजी मतदान होणार आहे. महायुतीच्या उमेदवारांच्या प्रचारासाठी मुंबईत पंतप्रधान नरेंद्र मोदी यांचा रोड शो आयोजित करण्यात आला होता. या रोडशोदरम्यान मोठ्या संख्येने महायुतीचे कार्यकर्ते उपस्थित होते. प्रचंड अशी गर्दी पंतप्रधान मोदींच्या रोड शो दरम्यान बघायला मिळाली. यावेळी महिला, वृद्ध व लहान मुलांनी मोठ्या संख्येने सहभाग घेतला. (Sushant Shelar Meet PM)
या रोडशोनंतर पंतप्रधान मोदींनी मुंबईतील जनतेचे आभार मानले. तसेच दिवंगत बाळासाहेब ठाकरे यांच्या स्वप्नतील मुंबई घडवण्याचा आमचा प्रयत्न आहे, असेही ते म्हणाले. मुंबईतील ईशान्य मुंबईतील या रोडशोमध्ये मोदींनी भाजप कार्यकर्त्यांचा आत्मविश्वास वाढविला. यावेळी मराठमोळा अभिनेता सुशांत शेलारने पंतप्रधान नरेंद्र मोदींची भेट घेतली. या खास भेटीचा फोटो व व्हिडीओ सुशांतने त्यांच्या इन्स्टाग्राम अकाउंटवरुन पोस्ट केला आहे.
सुशांत शेलारने त्याच्या सोशल मीडिया अकाउंटवरुन पंतप्रधानांच्या भेटीदरम्यानचे फोटो व व्हिडीओ पोस्ट केले आहेत. यावेळी त्याने ही पोस्ट शेअर करत असं म्हटलं आहे की, “आयुष्यातला मौल्यवान क्षण. माननीय पंतप्रधान श्री. नरेंद्रभाई मोदी साहेब यांची भेट. हे शक्य झालं माननीय मुख्यमंत्री श्री. एकनाथजी शिंदे साहेब यांच्या आशीर्वादामुळे”. या भेटीमुळे त्याने एकनाथ शिंदे यांचे आभार मानले आहेत. पंतप्रधानांच्या भेटीमुळे तो भारवला असल्याचंही पाहायला मिळालं.
सुशांत शेलार काही दिवसांपासून राजकारणात सक्रिय आहे. शिवसेना शिंदे गटमध्ये सुशांत सध्या कार्यरत आहे. त्यामुळे एकनाथ शिंदे यांच्याबरोबर त्यांचे जिव्हाळ्याचे संबंध आहेत. एकनाथ शिंदे यांच्याबरोबर तो बरेचदा प्रसारमाध्यमांमध्येही दिसला आहे. सोशल मीडियावरही तो राजकारणाशी संबंधित अनेक पोस्ट शेअर करताना दिसतो. सुशांतने आजवर अनेक मराठी मालिका व चित्रपटांमध्ये महत्त्वपूर्ण भूमिका करत प्रेक्षकांच्या मनात घर केलं आहे.