‘ठाकरे’, महाराष्ट्राच्या राजकारणातील एक सक्रिय नाव, प्रबोधन ठाकरे यांच्याकडून लोकसेवेचा व जनहिताचा वसा घेत बाळासाहेब ठाकरे यांनी शिवसेना पक्षाची स्थापना केली. तेव्हापासून महाराष्ट्रासह देशाच्या राजकारणात सक्रिय असलेले ‘ठाकरे’ घराणे आजही राजकारणात तितकेच सक्रिय आहे. बाळासाहेबांच्याच बरोबरीने राज ठाकरे व उद्धव ठाकरे यांनी राजकारणाचे धडे गिरवले आणि त्यांच्याच शिकवणीत आता अमित व आदित्य ठाकरे ही तिसरी पिढीदेखील राजकारणात आहे.
पण ‘ठाकरे’ घराण्यातील एक मुलगा असाही आहे, ज्याला राजकारणात अजिबात रस नाही. सभेत भाषण करण्याऐवजी त्याला ७० मिमीच्या मोठ्या स्क्रीनद्वारे त्याला प्रेक्षकांच्या मनावर अधिराज्य गाजवायचे आहे आणि तो म्हणजे स्मिता ठाकरे यांचा मुलगा ऐश्वर्य ठाकरे. त्याला राजकारणात अजिबातच रस नाही. त्यामुळे ठाकरे घराण्यातील ऐश्वर्यने राजकारणात जाण्याचा मार्ग न अवलंबता मनोरंजनाच्या क्षेत्रात आपली वेगळी वाट निवडली आहे.
ऐश्वर्यने चित्रपटांच्या सेटवर ५-५ वर्षे घालवली आहेत. त्याने सहाय्यक म्हणून काम केले आहे. त्याला चित्रपट, संगीत आणि कला यांमध्ये प्रचंड रुची असून गेली १५ वर्षे तो चित्रपट समजून घेण्याचा प्रयत्न करत असल्याचे म्हटले जात आहे. त्यामुळे त्याच्या चित्रपट प्रदर्शनाविषयी अनेक चर्चा रंगताना दिसत आहेत.
‘एबीपी’ला सूत्रांनी दिलेल्या माहितीनुसार, ऐश्वर्य ठाकरे आता लवकरच बॉलिवूडमध्ये पाऊल ठेवणार आहे. येत्या काही महिन्यात याबाबतची एक मोठी घोषणा होऊ शकते. काही मोठे निर्माते ऐश्वर्यबरोबरच्या चित्रपटाची घोषणा करण्याची शक्यता आहे. ऐश्वर्यचे दणक्यात लाँचिंग करण्याचे नियोजन असल्याची माहिती सूत्रांनी दिली.
दरम्यान, ऐश्वर्यची आई स्मिता ठाकरे या स्वत: चित्रपट निर्मात्या आणि सामाजिक कार्यकर्त्या आहेत. पण, ठाकरे कुटुंबातील व्यक्तीने थेट चित्रपटात अभिनेता म्हणून काम केले नाही. मनसे अध्यक्ष राज ठाकरे यांनी काही चित्रपटांसाठी आपला आवाज दिला आहे. मात्र, अभिनयापासून लांब राहिले. त्यामुळे आता ऐश्वर्यबाबत ही मोठी घोषणा कधी होणार? याकडे सगळ्यांचे लक्ष लागले आहे.