रस्त्यावरील विक्रेत्यांकडून खरेदी करणे हा आजही अनेकांच्या आवडीचा विषय. तुम्ही कितीही मोठे आणि श्रीमंत झालात तरी रस्त्यावरील विक्रेत्यांकडून खरेदी करणं हे अनेकांनाच आवडते आणि हाच आनंद एका भारतीय क्रिकेटपटूने घेतला आहे. भारताचा माजी क्रिकेटपटू सुरेश रैनाने नुकताच त्याच्या सोशल मीडियाद्वारे एक व्हिडीओ शेअर केला आहे, ज्यामध्ये तो परळच्या मार्केटमध्ये रस्त्यावरील एका फळ विक्रेतीकडून खरेदी करताना दिसत आहे.
सुरेश रैनाने त्याच्या इन्स्टाग्राम अकाऊंटद्वारे हा खास व्हिडीओ शेअर केला आहे. या व्हिडीओमध्ये तो जांभूळ खरेदी करताना पाहायला मिळत आहे. सुरेश रैनाने शेअर केलेल्या या व्हिडीओमध्ये तो सुरुवातीला फळ विक्रेत्या महिलेची विचारपुस करतानाही पाहायला मिळत आहे. यानंतर तो तिच्याकडून जांभूळ खरेदी करत आहे. यानंतर तो त्याच्या बाजूला येणाऱ्या व्यक्तीबरोबरही संवाद करत आहे.
आपल्या दमदार खेळीने चर्चेत राहणारा भारतीय संघाचा हा क्रिकेटपटू त्याच्या या साध्याभोळ्या वागणुकीने पुन्हा एकदा चर्चेत आला आहे. याचसह आपल्या श्रीमंतीचा व पदाचा कोणताही बडेजाव न करता त्याने रस्त्यावरील केलेल्या या खरेदीने सर्वाचेच लक्ष वेधून घेतले आहे. त्याचबरोबर त्याच्या या कृतीला अनेकांनी साधेपणाची उपमा देत त्याचे कौतुकही केले आहे.
सुरेश रैनाने जामून जॉय (जांभूळ घेण्याचा आनंद) असं म्हणत हा व्हिडीओ शेअर केला आहे. त्याने शेअर केलेल्या या व्हिडीओला त्याचया चाहत्यांनीही लाईक्स व कमेंट्स करत प्रतिसाद दिला आहे. तसेच या व्हिडीओखाली त्याच्या अनेक चाहत्यांनी सुरेश रैनाच्या या साध्या भोळ्या कृतीचे कौतुक केले आहे.
दरम्यान, सध्या सुरेश रैना आयपीएल 2024 मध्ये कॉमेंट्री करताना दिसत आहे. स्पर्धेतील जवळपास सर्वच सामन्यांमध्ये तो कॉमेंट्री बॉक्समध्ये दिसून येतो. सुरेश रैनाची कॉमेंट्री चाहत्यांनाही खूप आवडते. त्याच्या बोलण्याच्या शैलीने चाहते प्रभावित होत आहेत.
