घर म्हटलं की भांड्याला भांडं हे लागणारच आणि या भांड्यांचा आवाज हा घराबाहेर जाणारच. कुटुंब म्हणून कितीही एकत्र राहण्याचा प्रयत्न केला तरीही कुटुंबातील सदस्यांमध्ये मतभेद, वादविवाद, रुसवे-फुगवे हे होतच असतात. सामान्य कुटुंबासह अगदी बॉलिवूडमधील मोठ्या घराण्यातदेखील हे मतभेद व वादविवाद होत असतात. गेले काही दिवस बॉलिवूडमधील बच्चन कुटुंबियांबद्दलचे अनेक वाद सोशल मीडियावर व्हायरल झालेले पाहायला मिळाले. यामुळे अभिषेक बच्चन व ऐश्वर्या राय आपल्या लेकीसह बच्चन कुटुंबियांच्या ‘जलसा’मधून बाहेर पडल्याचे वृत्त आले होते.
अशातच आता त्यांच्याबाबत आणखी एक बातमी समोर येत आहे, ती म्हणजे ऐश्वर्या राय व अभिषेक बच्चन आता मुलगी आराध्याबरोबर परदेशात राहणार आहेत. मीडिया रिपोर्ट्सनुसार, ऐश्वर्या राय आणि अभिषेक बच्चन यांनी त्यांच्या मुलीच्या भविष्यासाठी मोठा निर्णय घेतला आहे. आराध्या बच्चन आपल्या पुढील शिक्षणासाठी परदेशात जाणार असल्याचे म्हटले जात आहे. आराध्या बच्चन ही सध्या दहावीचे शिक्षण घेत असून हे शिक्षण पूर्ण झाल्यानंतर ती पुढील शिक्षण घेण्यासाठी लंडन किंवा न्यूयॉर्कला जाणार असल्याची माहिती आहे.
आराध्या ही बॉलिवूडमधील काही स्टारकिड्सपैकी एक आहे. त्यामुळे तिच्या प्रत्येक कृतीवर मीडियाची नजर असते. अशातच तिने नुकतेच होळीनिमित्त काही खास फोटो शेअर केले. आराध्याचे हे होळी खेळतानाचे फोटो चाहत्यांना खूप आवडले. बच्चन कुटुंबासाठी ही होळी खूप खास असल्याचे बोलले जात आहे. आराध्या परदेशात जाणार असल्यामुळे यंदाची होळी तिच्यासाठी खास होती.
दरम्यान, घटस्फोटाच्या चर्चांदरम्यान मुलगी आराध्या बच्चनच्या शाळेच्या कार्यक्रमातही ऐश्वर्या व अभिषेक एकत्र दिसले होते. त्यानंतर ‘द आर्चीज’ या चित्रपटाच्या प्रीमिअरसाठी संपूर्ण बच्चन कुटुंब एकत्र आलं होतं. यावेळीसुद्धा अभिषेक व ऐश्वर्या एकत्र दिसले होते. त्याचा व्हिडीओ सोशल मीडियावर व्हायरल झाला होता. अशातच त्यांच्या परदेशात जाण्याची बातमी सर्वांचे लक्ष वेधून घेत आहे.
