Ashish Kulkarni and Swanandi Tikekar Wedding : मराठी मनोरंजन विश्वातील दोन लोकप्रिय जोडप्यांचा विवाहसोहळा नुकताच पार पडला. गेले काही दिवस त्यांच्या लग्नाच्या चर्चा सोशल मीडियावर चांगल्याच रंगल्या होत्या. त्यांच्या लग्नाच्या आधीच्या विधींनी त्यांच्या चाहत्यांना लग्नविषयी उत्सुकता लावली होती. अखेरीस या जोड्या विवाहबंधनात अडकल्या आहेत. त्या लोकप्रिय जोड्या म्हणजे गौतमी-स्वानंद आणि स्वानंदी-आशिष. त्यांच्या लग्नाचे काही खास क्षण त्यांनी नुकतेच सोशल मीडियावर शेअर केले असून या फोटो व व्हिडीओला नेटकऱ्यांकडून तुफान प्रतिसाद मिळत आहे. अशातच स्वानंदी-आशिष यांनी नुकताच सोशल मीडियावर एक व्हिडीओ शेअर केला आहे. (Ashish Kulkarni and Swanandi Tikekar On Instagram)
स्वानंदी-आशिष यांनी त्यांच्या लग्नातील विधींचा खास व्हिडीओ सोशल मीडियावर शेअर केला असून या व्हिडीओला नेटकऱ्यांकडून चांगलाच प्रतिसाद मिळत आहे. विशेष म्हणजे यामध्ये आशिषने पत्नी स्वानंदीसाठी त्याच्या आवाजातले खास रोमँटिक गाणे गायले आहे तर स्वानंदीनेही या आपल्या नवऱ्याला गाण्यासाठी साथ दिली आहे. स्वानंदी-आशिष यांनी ‘लाल सिंह चड्ढा’ चित्रपटातील ‘तेरे हवाले’ हे गाणं गायलं आहे. यावेळी स्वानंदीचे वडिल आपल्या लेकीच्या पाठवणीत भावुक झाल्याचे पाहायला मिळाले आहे. यावेळी त्यांनी आपल्या लेकीला घट्ट मिठीही मारली आहे.
या व्हिडीओमध्ये त्यांच्या लग्नाचे काही खास क्षण दाखवण्यात आले असून या दोघेही अत्यंत आनंदी दिसत आहेत. तसेच या व्हिडीओमध्ये स्वानंदीने लग्नासाठी खास गुलाबी रंगाची नऊवारी साडी नेसली होती. तर आशिषने लग्नासाठी पांढऱ्या रंगाचा कुर्ता व त्यावर स्वानंदीच्या साडीला साजेसा असा धोतर परिधान केला होता. अंत्यत पारंपरिक व आकर्षक अशा दोघांचा लग्नाचा लूक चाहत्यांनाही विशेष भावला आहे. त्याचबरोबर लग्नातील साधेपणाने सर्वांचेच लक्ष वेधून घेतले.
दरम्यान, स्वानंदी-आशिष यांनी शेअर केलेल्या या व्हिडीओला मराठीतील अनेक कलाकारांनी लाईक्स व कमेंट्स करत चांगलाच प्रतिसाद दिला आहे. अनेकांनी कमेंट्सद्वारे त्यांना त्यांच्या लग्नासाठी शुभेच्छा व आशीर्वाद दिले आहेत. तसेच “खूप छान, खूप गोड दिसत आहात, शुभेच्छा, अभिनंदन” अशा अनेक कमेंट्स करत चाहत्यांनी कौतुकाचा वर्षाव केला आहे.
