बॉलिवूड अभिनेत्री शेफाली शाहने तिच्या अभिनयाने सिनेसृष्टीत स्वतःच नाव कमावलं आहे. तिच्या अभिनयाच्या जोरावर तिने स्वतःचा असा खूप मोठा चाहता वर्ग ही निर्माण केला आहे. सध्या शेफाली तिच्या आगामी ‘थ्री ऑफ अस’ या चित्रपटामुळे चर्चेत आली आहे. यावेळी ती बऱ्याच ठिकाणी मुलाखती देताना दिसतेय. दरम्यान, शेफाली २००५ मध्ये आलेल्या ‘वक्त: द रेस अगेन्स्ट टाइम’ या चित्रपटातील तिच्या भूमिकेबद्दल बोलताना दिसली. २००५ मध्ये रिलीज झालेल्या या चित्रपटात शेफालीने अक्षय कुमारच्या आईची भूमिका साकारली होती. तर अमिताभ बच्चन यांच्या पत्नीची भूमिका साकारली होती. शेफाली वयाने अक्षय कुमारपेक्षा खूपच लहान आहे, मात्र तरी तिला या चित्रपटात आईची भूमिका देण्यात आली होती, यावर आता शेफालीने प्रतिक्रिया दिली आहे. (Shefali Shah On Akshay Kumar)
अलीकडेच ‘इंडियन एक्सप्रेस’च्या एक्सप्रेस अड्डामध्ये शेफाली शाहने ‘वक्त’ चित्रपटात साकारलेल्या व्यक्तिरेखेचा उल्लेख केला. यावर शेफाली शाह म्हणाली की, “हे पात्र साकारण्याचे कारण आहे. मात्र, ‘मी माझ्या आयुष्यात अक्षय कुमारच्या आईची भूमिका कधीच साकारणार नाही”, असेही तिने यावेळी स्पष्टपणे सांगितले. यावेळी शेफालीने अत्यंत वाईट वागणूक देणाऱ्या एका दिग्दर्शक आणि अभिनेत्याबरोबर काम केल्याचा खुलासा केला. तसेच आपण कधीही पडद्यावर अक्षय कुमारच्या आईची भूमिका करणार नाही, असंही तिने नमूद केलं.
शेफालीला सेटवरील हायराकीबद्दल विचारण्यात आलं, तेव्हा ती म्हणाली, “मी तुम्हाला प्रामाणिकपणे सांगते की मला खूप चांगल्या लोकांबरोबर काम करायला मिळालं, त्याचा मला आनंद आहे. असं उत्तर ऐकायला चांगलं वाटतं म्हणून मी बोलत नाहीये, तर हे खरं आहे. मी कदाचित एका दिग्दर्शक आणि एका अभिनेत्याबरोबर काम केले असेल, जे अत्यंत वाईट वागणूक देणारे होते. त्याशिवाय, मी सर्व अशा दिग्दर्शकांबरोबर काम केलं आहे, ज्यांना वाटतं की कलाकार फक्त कलाकार नसून सहकारी असतात.” त्यानंतर शेफाली हसून म्हणाली, “मी वचन देते की मी आयुष्यात पुन्हा कधीच अक्षय कुमारच्या आईची भूमिका करणार नाही.”
शेफाली शाहने ‘वक्त’चित्रपटात अक्षयच्या आईची भूमिका साकारली होती, तर ‘डार्लिंग’मध्ये तिने एका बाईची भूमिका साकारली होती. शेफाली शाहला इंटरनॅशनल एमी अवॉर्ड्स २०२३ मध्ये ‘सर्वोत्कृष्ट अभिनेत्री’ या श्रेणीत नामांकन मिळाले आहे.
