Anshuman Vichare Wife Video : मराठमोळा अभिनेता अंशुमन विचारे घराघरात लोकप्रिय आहे. त्याने ‘महाराष्ट्राची हास्यजत्रा’, ‘कॉमेडीची बुलेट ट्रेन’ यांसारखे अनेक विनोदी कार्यक्रम केले आहेत. त्याच्या परफेक्ट विनोदाच्या टायमिंगमुळे तो प्रेक्षकांचा आवडता अभिनेता आहे. त्याचप्रमाणे त्याने अनेक नाटकांत आणि चित्रपटातदेखील काम केलं आहे. अंशुमन सोशल मीडियावर सक्रिय असतो. परंतु सोशल मीडियावर जितकी चर्चा अंशुमनची होत नाही, तितकी चर्चा त्याच्या लेकीची आणि बायकोची असते. अंशुमन आणि त्याची बायको नेहमीच सोशल मीडियावर काही ना काही गमतीशीर व्हिडीओ बनवून शेअर करत असतात. अशातच अंशुमनची पत्नी पल्लवी हिने नुकत्याच शेअर केलेल्या एका व्हिडीओने सऱ्यांच लक्ष वेधून घेतलं आहे.
“जर मालकाला दुकान चालवण्याची थोडीशी आवड असेल तर कृपया तुमच्या कर्मचाऱ्यांकडे लक्ष द्या,” असं कॅप्शन लिहित अंशुमन विचारेची पत्नी पल्लवीने एक व्हिडीओ शेअर केला आहे. एका दुकानात अभिनेत्याला मिळालेल्या वाईट वागणुकीविषयी त्याच्या पत्नीने या व्हिडीओद्वारे भाष्य केलं आहे. या व्हिडीओद्वारे पल्लवीने घडलेली संपूर्ण घटना सांगितली आहे. तसंच चाहत्यांना या दुकानात न जाण्याचा सल्ला दिला आहे.
व्हिडीओ शेअर करत अंशुमनच्या पत्नीने असं म्हटलं की, “हे शॉप आहे. गुलाबी टी-शर्टवाला दुकानाचा मॅनेजर आहे. आम्ही याचा इन्स्टाग्रामवरचा रील व्हिडीओ बघून इथे आलो होतो. ठाण्यातील या दुकानात ब्रँडेड शूज, ७० टक्के सवलत असं काही नाही आहे. अत्यंत वाईट वागणूक मिळते. इथे काम करणाऱ्या मुलांना ग्राहकाशी बोलण्याची पद्धत नाही. गुलाबी टी-शर्टवाल्याला खालून वेअर हाउसमधून शूज आणून द्यावे लागले म्हणून हा अंशूला अत्यंत वाईट पद्धतीने बोलला की, पहिलं तुम्हाला सांगता येत नाही का? मला खालून आणावे लागले ना. मग मी सुनावलं, तुझं हे काम आहे. तू सर्व्हिस सेक्टरमध्ये कामाला आहेस. त्याच्यामध्ये तुला इतका त्रास होण्यासारखं काही नाही. पण आम्ही खरेदी केली नाही, म्हणून त्याला त्रास आहे”.
तिने पुढे असंही म्हटलं आहे की, “इथे अजिबात जाऊ नका. खूप वाईट वागणूक मिळते. त्यापेक्षा दोन पैसे जास्त देऊन मला ब्रँडेड शॉपमध्ये गेलेलं परवडेल. पण, ग्राहकांना अशी वागणूक देते असतील तर इथे जाण्याचा काही फायदा नाहीये. इथे काहीही स्वस्त नाहीये. महागचं आहे. ५ ते ६ हजारांपासून शूजची किंमत सुरू होते”.
