Huma Qureshi On Paparazzi : बॉलिवूडमध्ये सध्या पापाराझीबाबत अनेक प्रतिक्रिया येत आहेत. बॉलीवूड सेलेब्स याबद्दल खूप बोलत आहेत. अलीकडेच जया बच्चन यांनी पापाराझी संस्कृतीवर भाष्य केले होते, त्यानंतर बॉलिवूडमध्ये चर्चेला उधाण आले होते. पापाराझी संस्कृतीबद्दल अनेक सेलिब्रिटी बोलले आहेत आणि आता हुमा कुरेशीने या विषयावर आपले मत व्यक्त केले आहे. नुकतीच ती एका कार्यक्रमाला गेली होती. जिथे ती म्हणाली की, सेलिब्रेटी देखील पापाराझींचा फायदा घेतात आणि त्यांना स्वतःला कॉल देखील करतात.
हुमाने कबूल केले की, बॉलिवूड सेलिब्रिटी चित्रपटांच्या प्रमोशनसाठी पापाराझीचा वापर करतात. हुमा म्हणाली, “प्रत्येकजण आपापले काम करत आहे. ही एक परिसंस्था आहे. मी पापाराझींवर विशेष भाष्य करणार नाही. पण मला वाटतं जर आपण संपूर्ण माध्यमं आणि प्रेक्षकांकडे एकाच दृष्टीकोनातून पाहिलं तर कोणत्याही व्यक्तीशी योग्य पद्धतीने बोलणं ही आपल्या सर्वांची जबाबदारी आहे. बोलण्याची योग्य पद्धत असावी. असे होऊ शकते की आपण एखाद्याशी सहमत नाही किंवा कोणाला आपल्याकडून काहीतरी जाणून घ्यायचे आहे”.
हुमा पुढे म्हणाली, “जर तुम्हाला माझ्या गोपनीयतेत ढवळाढवळ करायची असेल, तर तुम्ही असे प्रश्न विचाराल जे मला योग्य वाटणार नाहीत. किंवा कदाचित मी एक विशिष्ट पोशाख घातला आहे आणि तुम्ही ते एका विशिष्ट कोपऱ्यातून टिपण्याचा प्रयत्न करत आहात जे योग्य नाही. एक मर्यादा आहे जी मला वाटते की लोकांनी कधीही ओलांडू नये. पण आपण ती रेषा ओलांडतो, हे सत्य आहे. मी काही नवीन बोलत नाही. एक महिला अभिनेत्री असल्याने मी हे सर्व अनुभवले आहे. पत्रकार परिषदेत मला कोणीतरी चुकीचा प्रश्न विचारला”.
पापाराझीशी तुमचा काय संबंध आहे?
हुमा म्हणाली, “सुरुवातीला मी माझी उत्तरे देताना थोडीशी संकोच करत होते कारण मला भीती होती की माझी उत्तरे दुसऱ्या दिवशी ट्रेंड ठरू शकतात. पण आज मी या सर्व परिस्थिती चांगल्या प्रकारे हाताळते. चुकीचे प्रश्न विचारणाऱ्यांना उत्तरे देण्यात मी अजिबात मागेपुढे पाहत नाही. ही देखील एक चांगली सवय आहे. माझे तत्वज्ञान सोपे आहे: गैरवर्तन करू नका आणि इतरांना चुकीचे वागू देऊ नका”.
आणखी वाचा – ‘आई कुठे काय करते’ फेम अभिनेत्री लवकरच अडकणार लग्नबंधनात, तारीख सांगत स्वतःच केला खुलासा, म्हणाली…
हुमा पुढे म्हणाली, :माझे पापाराझींसोबत खूप चांगले संबंध आहेत. मला वाटते की ते देखील महत्वाचे आहेत. मी खोटे बोलणार नाही, पण जेव्हा आपल्याला आपल्या चित्रपटांचे प्रमोशन करायचे असते किंवा आपल्या आयुष्यातील काही खास पैलू लोकांसमोर आणायचे असतात तेव्हा आपण त्यांचा वापर करतो. असे अनेकवेळा घडले आहे जेव्हा आम्हाला आमच्या चित्रपटांचे प्रमोशन करायचे होते, म्हणून आम्ही त्यांना प्रीमियरसाठी आमंत्रित केले. जेव्हा आपल्याला कुठेतरी पहायचे असेल तेव्हा आपण त्यांना कॉल करतो. मला सर्व दोष त्यांच्यावर टाकायचा नाही”.
