सोशल मीडियावर एखादा ट्रेंड सुरु झाला की, तोच ट्रेड लाखो लोक फॉलो करताना दिसतात. मग ते एखादं गाणं असो, मेकअप टिप्स असो वा एखादी रेसिपी. सोशल मीडिया पाहून कृती करणारे, रिल बनवणारे असंख्य आहेत. आता असाच एक ट्रेंड सध्या धुमाकूळ घालत आहे. ते म्हणजे भरलेल्या पाण्याच्या ग्लासामध्ये हळद टाकणे. पाण्याच्या ग्लासात हळद टाकून मोबाईलच्या लाइटवर संपूर्ण दृश्य पाहण्याचा ट्रेंड आहे. आतापर्यंत हजारो लोकांनी अशाप्रकारे व्हिडीओ शूट करत सोशल मीडियाद्वारे शेअर केला आहे. ट्रेंड फॉलो करण्यास सगळेच व्यग्र असताना काही तज्ज्ञांनी हा मुर्खपणा असल्याचं म्हटलं आहे. मजा म्हणून तुम्ही फॉलो केलेला हा ट्रेंड तुमच्यासाठी घातक ठरु शकतो अशी चर्चा आहे. (turmeric water trend)
अरुण कुमार व्यास नावाच्या ज्योतिषांनी यासंदर्भात इन्स्टाग्राम अकाऊंटद्वारे एक व्हिडीओ शेअर केला आहे. व्हिडीओद्वारे त्यांनी हा ट्रेंड फॉलो करण्याचे तोटे सांगितले आहेत. पाण्यात हळद घालून व्हिडीओ बनवणं ही सामान्य प्रक्रिया नसल्याचं अरुण यांचं म्हणणं आहे. ही प्रक्रिया एक तांत्रिक प्रक्रिया असल्याचं त्यांनी स्पष्ट म्हटलं आहे. तरीही सोशल मीडियाद्वारे अशाप्रकारचे अनेक व्हिडीओ सातत्याने येत आहेत.
अरुण म्हणाले, “पाण्यात हळद टाकून तुम्ही व्हिडीओ बनवत असाल तर ही काही सामान्य प्रक्रिया नाही. ही एक तांत्रिक प्रक्रिया आहे. या प्रक्रियेद्वारे भूतांनाही बोलावलं जातं. मजा म्हणून अशाप्रकारचा व्हिडीओ बनवू नका. अशाप्रकारचं शूट न करणंच तुमच्यासाठी चांगलं आहे. जेव्हा तुम्ही पाण्यामध्ये हळद टाकता तेव्हा जन्मकुंडलीमधील तुमचे ग्रहही कमकुवत होतात”.
“जन्मकुंडलीतील चंद्र आणि गुरु या ग्रहांवर त्याचा परिणाम होतो. यामुळे तुमच्या घरात संकटं येऊ शकतात. त्याचप्रमाणे तुमच्या मानसिक आरोग्यावरही याचा परिणाम होऊ शकतो. मजा करण्याची ही गोष्ट नाही. तुम्ही हा व्हिडीओ न बनवणंच फायदेशीर ठरेल. स्वतःचं नुकसान कृपया करुन घेऊ नका”. आता खरंच हा ट्रेंड बंद होणार का? हे पाहावं लागेल.
