झी मराठी वाहिनीवरील ‘सातव्या मुलीची सातवी मुलगी’ ही मालिका सध्या चांगलेच गाजत आहे आणि याच मालिकेतून प्रेक्षकांच्या भेटीला येणारी लोकप्रिय अभिनेत्री म्हणजे तितीक्षा तावडे. तितीक्षाने आजवर अनेक लोकप्रिय मालिकांमधून प्रेक्षकांच्या मनात आपलं घर केलं आहे. याचसह मोठ्या पडद्यावरही सक्षम भूमिका साकारत तिने प्रेक्षकांचे मनोरंजन केलं आहे. अभिनय क्षेत्रासह तितीक्षाही सोशल मीडियावरही चांगलीच सक्रिय असते. सोशल मीडियावर ती तिचे अनेक फोटो व व्हिडीओ शेअर करत असते.
आपल्या अभिनयाने चर्चेत असणारी तितीक्षा काही दिवसांपूर्वीच तिच्या लग्नसोहळ्यामुळे चर्चेत आली. तितीक्षाने अभिनेता सिद्धार्थ बोडकेसह लग्नगाठ बांधली. ६ फेब्रुवारी रोजी तितीक्षा व सिद्धार्थ यांचा अगदी शाही थाटामाटात विवाह सोहळा संपन्न झाला. दोघांच्या लग्नाची सोशल मीडियावर बरीच चर्चा रंगली होती. तितीक्षाची ‘सातव्या मुलीची सातवी मुलगी’ ही मालिका अनेकजण आवडीने पाहत असले तरी तिच्या सासू मात्र ही मालिका पाहत नसल्याचे अभिनेत्रीने सांगितले आहे.
तितीक्षा तावडेने नुकताच ‘इट्स मज्जा’बरोबर खास संवाद साधला. यावेळी तितीक्षाला तिच्या सासूबद्दलचा प्रश्न विचारण्यात आला. “तुझ्या मालिकेवर सासूची काय प्रतिक्रिया असते?” असा प्रश्न विचारताच तितीक्षाने सासू मालिका बघत नसल्याचे सांगितले. यावेळी तितीक्षा असं म्हणाली की, “आमची मालिका रात्री साडे दहा वाजता प्रसारित होते. आई शिक्षिका असल्याने त्या रात्री उशिरा साडे दहानंतर फारशा जाग्या राहत नाहीत. कारण त्या सकाळी साडेचार वाजता उठतात. त्यामुळे त्या फार मालिका बघत नाहीत. क्वचितच कधीतरी त्या मालिका बघतात”.
यापुढे तितीक्षा तिची सासू मालिका बघत नसली तरी सासरे मात्र मालिका बघतात असं म्हटली आहे. “आई रोज मालिका बघत नसल्या तरी बाबा माझी मालिका रोज पाहतात. ते साडे दहानंतर जागे राहतात आणि ते मालिकेच्या कथानकाबद्दल अगदी अपडेटेड असतात. त्यांना मालिकेत काय चालू आहे काय नाही हे माहिती असतं. त्याचबरोबर सिद्धार्थचे आजोबाही माझी मालिका बघतात. ते फार मनापासून माझी मालिका बघतात आणि त्यांना माझे प्रत्येक हावभाव माहीत असतात. प्रत्येक सीनलं ते मला फोन करून त्यांची प्रतिक्रिया देतात”.
