अभिनेत्री तितीक्षा तावडे व अभिनेता सिद्धार्थ बोडकेच्या शाही विवाहसोहळ्याची सर्वत्र चर्चा सुरु असलेली पाहायला मिळत आहे. अखेर ही जोडी काल लग्नबंधनात अडकली आहे. त्यांच्या लग्नसोहळ्याचे अनेक फोटो, व्हिडीओ सोशल मीडियावर व्हायरल होताना पाहायला मिळत आहेत. लग्नसोहळ्यासाठी केलेल्या दोघांच्या पारंपरिक लूकचीही सर्वत्र चर्चा रंगलेली पाहायला मिळत आहे. जवळचे कुटुंबीय, नातेवाईक व कलाकार मंडळींच्या उपस्थितीत तितीक्षा व सिद्धार्थ यांचा लग्नसोहळा पार पडला. (Titeeksha Tawde Siddharth Bodke Wedding)
तितीक्षाच्या लग्नाला तिची बहीण अभिनेत्री खुशबू तावडेही भाव खावून गेली. बहिणीच्या लग्नासाठी खुशबूचा खास लूक लक्षवेधी ठरला. तितीक्षा व खुशबू यांच्यातील बहिणीचं नातं सर्वांनाच माहित आहे. खुशबूने आजवर मोठी बहीण म्हणून लहान बहिणीची जबाबदारी अचूकरीत्या सांभाळली आहे. दोघा बहिणींमधील बॉण्डिंग नेहमीच चाहत्यांच्या पसंतीस पडतं. तितीक्षाच्या लग्नाची जबाबदारीही खुशबूने पेलवत अगदी योग्य पद्धतीने हा शाही विवाहसोहळा पार पाडला.
‘इट्स मज्जा’ला दिलेल्या मुलाखतीत खुशबूने बहिणीबद्दलची काळजी व्यक्त केली. “तितीक्षा व तुझं नातं हे बहिणींपेक्षा आई मुलीचं असं अधिक असल्याचं नेहमीच जाणवतं, आता लग्नसोहळ्याला आई या नात्याने तू कशी जबाबदारी पेलवणार आहेस?”, असा प्रश्न खुशबूला विचारण्यात आला होता, तेव्हा ती म्हणाली, “मुळात मी व तितीक्षा जवळजवळ दहा-बारा वर्ष शिक्षणासाठी, करिअरसाठी घरापासून दूर आहोत. त्यामुळे नवीन असं काही नाही. त्यामुळे तितीक्षा लग्न करुन घरापासून दूर कुठेतरी जाणार आहे असं नाही आहे. याचं कारणही मला माहीत आहे. ती माझ्या बाजूच्या बिल्डिंगमध्येच राहायला येणार आहे. त्यामुळे लांब कुठेतरी जाणार अशी धाकधूक नाही आहे. पण लग्नाच्या दिवशी काळजी वाटणार हेही खरं आहे”, असंही ती म्हणाली.
पुढे ती म्हणाली, “एक आई म्हणून लग्न ठरेपर्यंत खूप जबाबदाऱ्या होत्या. काही निर्णय, तिच्याशी एखाद्या विषयावर संवाद असेल वा लग्नापर्यंत हे नातं नेण्यापर्यंतची प्रोसेस असेल प्रत्येक गोष्ट मला सांभाळावी लागली. लग्न ठरल्यानंतर नाही तर लग्न ठरण्याआधीपासून मी तिला आईपण दाखवलं. आयुष्यात, संसारात येणारे चढ-उतार कसे असतात ते ती माझ्या संसारातून पाहत आली आहे. त्यामुळे आई म्हणून तिला सांभाळण्याची जबाबदारी कायम असेल”.
