कलाकारांचं मंगळसूत्र ही एक फॅशन झाली आहे. सध्या सिनेसृष्टीत लगीनघाई सुरु असलेली पाहायला मिळत आहे. एकामागोमाग एक कलाकार मंडळी लग्नबंधात अडकताना पाहायला मिळत आहेत.या कलाकार मंडळींचे लूक, दागिने, पोशाख सर्वकाही चर्चेत ठरत आहे. अशातच अभिनेत्रींच्या मंगळसूत्राची विशेष चर्चा रंगलेली पाहायला मिळत आहे. प्रेक्षकांची लाडकी अभिनेत्री तितीक्षा तावडे नुकतीच विवाहबंधनात अडकली. तितीक्षाने अभिनेता सिद्धार्थ बोडकेसह लग्नगाठ बांधली आहे. दोघांच्या लग्नसोहळ्याचे खास फोटो समोर आले आहेत. (Titeeksha Tawde Siddharth Bodke Wedding Updates)
तितीक्षा व सिद्धार्थ यांचा आज शाही विवाहसोहळा संपन्न झाला आहे. दोघांनी अत्यंत साध्या व महाराष्ट्रीयन पद्धतीने त्यांचा विवाहसोहळा उरकला आहे. तितीक्षा व सिद्धार्थ यांचा पारंपरिक थाटामाटात लग्नसोहळा झाला असून दोघांच्या लूकचीही जोरदार चर्चा रंगलेली पाहायला मिळत आहे. लग्नासाठी तितीक्षाने मोती रंगाची नऊवारी साडी व त्यावर कॉन्ट्रास्ट सोनेरी रंगाचा ब्लाउज परिधान केला. या साडीला सोनेरी रंगाचा काठ असून त्यावर सोनेरी रंगाचं नक्षीकाम करण्यात आलं आहे. तसेच त्याच रंगाची शालही तिने घेतली आहे. तर सिद्धार्थने पांढऱ्या रंगाची शेरवानी घातली आहे. या लग्नसोहळ्यातील आकर्षणाची बाब म्हणजे तितीक्षा तावडेच मंगळसूत्र.
तितीक्षाच्या मंगळसूत्राने सर्वांचे लक्ष वेधले आहे. तिचे मंगळसूत्र हे अंत्यत सुंदर व नाजूक असून त्या डिझाइनची चर्चाही पाहायला मिळत आहे. तितीक्षाच्या या पारंपरिक मंगळसूत्राने साऱ्यांच्या नजरा वळविल्या आहेत. तितीक्षाच्या गळ्यातील सोन्याचं हे मंगळसूत्र खूपच आकर्षक दिसत आहे. तिच्या या मंगळसूत्राला देण्यात आलेला पारंपरिक टच विशेष लक्षवेधी ठरत आहे. त्यांच्या या नववधूवराच्या लूकमधील फोटोंवर चाहते व कलाकार मंडळी शुभेच्छांचा वर्षाव करताना दिसत आहेत.
बरीच वर्ष एकमेकांना डेट केल्यानंतर तितीक्षा व सिद्धार्थ लग्नबंधनात अडकले. लग्नापूर्वी थेट केळवणाचा फोटो शेअर करत दोघांनी त्यांच्या नात्याची जाहीर कबुली चाहत्यांसह शेअर केली. मैत्रीपासून सुरु झालेल्या नात्याचं प्रेमात रूपांतर झालं, आणि त्यानंतर अखेर आज दोघांनी विवाहसोहळा उरकला. दोघांनीही सहजीवनाच्या प्रवासाचं एक पाऊल टाकलं आहे.