‘तारक मेहता का उल्टा चष्मा’ ही मालिका बऱ्याच वर्षांपासून प्रेक्षकांच्या मनावर अधिराज्य गाजवत आहे. या मालिकेच्या कथानकाने प्रेक्षकांच्या मनात घर केलं आहे. मालिकेतील कलाकारांबरोबरचं मालिकेतील पात्रांनी मालिकेच्या प्रेक्षकांना खुर्चीत खिळवून ठेवलं. या टीव्ही मालिकेतून सोनूची भूमिका साकारणारी अभिनेत्री पलक सिधवानी हिचा नुकताच २६ वा वाढदिवस झाला. वाढदिवसानिमित्त सोनूने म्हणजेच पलकने आलिशान कार खरेदी केली. गाडी घेतल्याने पलकच्या आनंद गगनात मावेनासा झाला आहे. कारण तिने स्वतःच्या पैशाने ही कार घेत तिच्या आई-वडिलांचे स्वप्न पूर्ण केले आहे. पलक सिधवानीने सोशल मीडियावर एक व्हिडीओ शेअर करत याबाबतचे अपडेट चाहत्यांसह शेअर केले आहेत. (palak sindhvani baught new car)
नवीन गाडी खरेदी करण्यासाठी पलक तिच्या आई-वडिलांबरोबर शोरूममध्ये पोहोचली. तेथे त्यांनी गाडीची छोटी पूजा केली आणि मग केक कापून नवीन कार खरेदी केल्याचा आनंद साजरा केला. पलकची ही दुसरी कार आहे. याआधी २०२१ मध्ये तिने एक कार खरेदी केली होती आणि तिच्या वडिलांना त्यांच्या वाढदिवशी ती कार भेट दिली होती. तेव्हा पलकने भावुक पोस्ट करत सांगितले होते की, ही कार फारशी महाग नाही, पण तिच्या आई-वडिलांचे स्वप्न पूर्ण करण्यात तिला खूप आनंद झाला. कारण ही त्यांच्या कुटुंबातील पहिली कार होती.
आता पलक सिधवानीने तिच्या २६व्या वाढदिवसाला दुसरी कार खरेदी केली आहे. पलकने तिच्या नव्या गाडीची किंमत जाहीर केली नसून ती कार महाग नसून बजेटमध्ये असल्याचे सांगितले. व्हिडीओमध्ये पलकने असेही सांगितले की, आईला रुफटॉप कार हवी आहे आणि वडिलांना मोठी कार हवी आहे. तर तिला आणि तिच्या भावाला त्यांच्या आई-वडिलांचे सुख हवे होते. अशा परिस्थितीत आई-वडिलांची इच्छा पूर्ण केल्याचा तिला खूप आनंद झाला. याबाबत तिने देवाचेही आभार मानले आहेत.
पलक ११ एप्रिल रोजी २६ वर्षांची झाली. वाढदिवसादिवशी तिने एक भव्य पार्टी दिली होती. या पार्टीत नाविका कोटिया, सचिन श्रॉफ व सुनैना फौजदार उपस्थित होते. मात्र, ‘तारक मेहता…’ची ‘टप्पू सेना’ पलकबरोबर दिसली नाही.
