टेलिव्हिजनवरील लोकप्रिय मालिका ‘तारक मेहता का उलटा चष्मा’ने आजवर प्रेक्षकांच्या मनावर राज्य केलं आहे. गेली अनेक वर्ष ही मालिका प्रेक्षकांना हसवत आहे. या मालिकेतील प्रत्येक कलाकाराने आजवर प्रेक्षकांच्या मनावर अधिराज्य गाजवलं आहे. अर्थात ही मालिका प्रेक्षकांना खळखळून हसायला भाग पाडतेय. या मालिकेतील दयाबेन हे पात्र प्रेक्षकांच्या विशेष पसंतीस पडलं होतं. हे मात्र अभिनेत्री दिशा वकानी साकारत होती. मात्र मॅटर्निटी ब्रेक घेत दिशा वकानीने मालिकेतून एक्झिट घेतली. (Taarak Mehta Ka Ooltah Chashmah New Promo)
दिशा वकानीने मालिकेतून एक्झिट घेताच प्रेक्षकांची नाराजी पाहायला मिळाली. बरेचदा दयाबेन मालिकेत परतणार असं सांगण्यात येत होतं. असं असलं तरी अद्यापही दयाबेन मालिकेत काही दिसली नाही. पण आता मात्र शोमध्ये दयाबेन परत येत असल्याचं सांगण्यात आलं आहे. याचा एक प्रोमोही समोर आला आहे. त्यामुळे आता दयाबेनची शोमध्ये एन्ट्री होणार असल्याचं मानलं जात आहे.
नुकत्याच समोर आलेल्या प्रोमोमध्ये असं पाहायला मिळत आहे की, दयाबेन इथे नसल्याने जेठालाल त्यांचे परम मित्र मेहता यांच्याबरोबर दयाबेनला आणण्यासाठी अहमदाबाद जाण्याचं ठरवतात. टप्पू त्यांना तिकीटदेखील बुक करुन देतो. पण जेठालालला त्याचवेळी पोलीस स्टेशनमध्ये जावं लागतं. यादरम्यान सुंदर जेठालालला फोन करून दयाबेनला गोकुळधाम सोसायटीमध्ये घेऊन येणार असल्याचं सांगतो. दयाबेन येणार असल्याचं ऐकून जेठालाल, टप्पू, बापूजी यांना आनंद झालेला पाहायला मिळत आहे.
मालिकेच्या नव्या प्रोमोवरून चाहत्यांमध्ये ही उत्सुकता वाढलेली पाहायला मिळत आहे. आता खरंच दयाबेन मालिकेत परतणार का की आधीप्रमाणे ही देखील अफवा ठरणार हे पाहणं रंजक ठरणार आहे. मागील ६ वर्षांपासून प्रेक्षक तिच्या कमबॅकच्या प्रतिक्षेत आहेत. त्यामुळे आता दयाबेन म्हणून मालिकेत दिशा वकानी परत येणार की याजागी कोणता नवा चेहरा पाहायला मिळणार हे पाहणंही उत्सुकतेचं असणार आहे.