Suraj chavan on zee chitra gaurav awards 2026 : ‘झी मराठी’ वाहिनीच्या ‘झी चित्र गौरव पुरस्कार २०२६’ची बरेच दिवसांपासून चर्चा सुरु असलेली पाहायला मिळाली. अखेर काल ‘झी चित्र गौरव पुरस्कार २०२६’ चा हा दिमाखदार सोहळा पार पडला. यावेळी कलाकारांचे स्किट्स, डान्स पाहणं रंजक ठरलं. यावेळी भाऊ कदम, निलेश साबळे यांनीदेखील एक स्किट सादर केलं. आणि या स्कीटदरम्यान ‘बिग बॉस मराठी’ विजेता सूरज चव्हाणची नक्कल करण्यात आली. हा व्हिडीओ पाहून आता सूरजने व्हिडीओ शेअर करत त्याचं मत मांडलं आहे. सूरज चव्हाणने व्हिडीओ शेअर करत सोहळ्याला बोलावलंसुद्धा नाही, असं म्हणत खंत व्यक्त केली आहे. सूरजचा हा व्हिडीओ सोशल मीडियावर बराच व्हायरल झाला असून अनेकांनी यावर कमेंट करत त्याची बाजू सांभाळली आहे.
सूरज चव्हाण व्हिडीओ शेअर करत म्हणाला की, “काही कारणास्तव हा व्हिडीओ बनवावा लागतोय. माझं मन प्रचंड दुखावलंय. ‘झी चित्र गौरव पुरस्कार’ सोहळ्यात माझं कॅरेक्टर प्ले करण्यात आलं, याचा मला प्रचंड आनंद आहे. पण, माझ्या मनात एक खंत आहे. जी गोष्ट माझ्या मनाला खूप लागली आहे. झी चित्र गौरवची टीम ही सगळी मंडळी फार मोठी आहेत. त्यांच्याबद्दल मी काहीच बोलत नाही. पण, मला त्यांनी बोलावलं असतं आणि कुठल्या तरी कोपऱ्यात जरी बसवलं असतं तरी मला बरं वाटलं असतं. पण, मला फोनही केला नाही, बोलावलं सुद्धा नाही. हे पाहून माझं मन दुखावलंय. मी माझ्या चाहत्यांना देव मानतो. तुमच्या मनात आहे ना मी टॉपचा किंग, त्यामुळे मी जो आहे तो माझ्या आई-वडिलांमुळे आणि संपूर्ण महाराष्ट्रामुळे आहे”.
आणखी वाचा – “तिची खूप आठवण येते, आठ वर्षांचं रिलेशन…” एक्स पत्नी रिद्धी डोगराच्या आठवणीत राकेश बापट भावुक
पुढे सूरज म्हणाला, “त्या लोकांनी सूरज चव्हाणचं कॅरेक्टर एक नंबर केलं आहे. मलाही या गोष्टीचा प्रचंड आनंद आहे. माझे फॅन्स ते कॅरेक्टर पाहून खूप हसतील, ते खूश मी सुद्धा खूश! पण मला एक खंत आहे, तो सोहळा सुरु असताना एका तरी बाजूला मी कुठेतरी पाहिजे होतो, एवढीच माझी अपेक्षा होती. माझ्या फॅन्सना मी देव मानतो आज मी तुम्हाला आणि माझ्या महाराष्ट्राला एकच प्रश्न विचारतो, त्यांनी मला सोहळ्याला बोलावलं पाहिजे होतं की नाही? खरं सांगा’ असं म्हणत सूरज चव्हाणने खंत व्यक्त केली आहे.
