बॉक्स ऑफिसवर सध्या एकाच चित्रपटाची जोरदार चर्चा आहे, ती म्हणजे दिग्दर्शक दिग्पाल लांजेकर यांच्या ‘सुभेदार’ चित्रपटाची. सुभेदार तान्हाजी मालुसरे यांचा पराक्रम मोठ्या पडद्यावर पाहायला मिळत आहे. सुभेदार तान्हाजी मालुसरे यांच्या भूमिकेत अभिनेते अजय पुरकर दिसत आहे. या भूमिकेसाठी अजय पुरकर यांनी प्रचंड मेहनत घेतली असून त्यांची ही मेहनत फळाला येत आहे. त्यांच्या या भूमिकेला प्रेक्षकांकडून कौतुकाचा वर्षाव होत आहे. (Ajay Purkar debut in South Film Industry)
एकीकडे त्यांच्या भूमिकेला व चित्रपटाला प्रतिसाद मिळत असतानाच अजय पुरकर लवकरच एका नव्या चित्रपटात झळकणार आहे. मात्र मराठी किंवा हिंदीत नव्हे, तर दाक्षिणात्य चित्रपटात. अभिनेते अजय पुरकर एका तेलुगू चित्रपटात झळकणार असून या चित्रपटातून ते दाक्षिणात्य चित्रपटसृष्टीत पदार्पण करणार आहेत. ‘स्कंद’ असे या चित्रपटाचे नाव आहे, ज्याचे दिग्दर्शन ‘अखंड’ फेम दिग्दर्शक बोयापती श्रीनु यांनी केले आहे.
अभिनेता राम पोट्टीनेनी यात मुख्य भूमिका साकारत असून त्याच्यासह मराठमोळी अभिनेत्री सई मांजरेकर व श्रीलीलासुद्धा असणार आहे. चित्रपटाचे ट्रेलर नुकतेच प्रदर्शित झाले आहे. चित्रपटाच्या ट्रेलरमध्ये भरपूर ऍक्शनचा भरणा असून अभिनेते अजय पुरकर यांची एक झलकसुद्धा पाहायला मिळाली आहे. या चित्रपटात अजय पुरकर महत्वाच्या भूमिकेत आपल्याला पाहायला मिळणार असून त्यांना या नव्या भूमिकेत पाहण्यासाठी त्यांचे चाहते प्रचंड उत्सुक आहे.
हे देखील वाचा – ‘सुभेदार’ चित्रपटाचा बॉक्सऑफिसवर धुमाकूळ, दोन दिवसांत कमावले तब्बल इतके कोटी
दरम्यान, चित्रपटाच्या प्री-रिलीज इव्हेंटप्रसंगी दिग्दर्शक बोयापती श्रीनु यांनी अजय पुरकर यांच्या ‘सुभेदार’ चित्रपटातील भूमिकेचे व चित्रपटाचे भरभरून कौतुक केले आहे. सोशल मीडियावर हा व्हिडिओ व्हायरल होत असून तो व्हिडिओ चाहत्यांच्या पसंतीस उतरत आहे.
हे देखील वाचा – Video : परदेशात जाऊन सुव्रत जोशीने खाल्ले किडे, व्हिडिओही केला शेअर, म्हणाला, “किडे खाऊन मी…”
अजय पुरकर हे आजवर अनेक मराठी मालिका व चित्रपटांमध्ये झळकले आहेत. शिवाय, त्यांनी हिंदी चित्रपटांमध्येदेखील काम केले असून त्यांच्या दाक्षिणात्य चित्रपटसृष्टीतील एन्ट्रीची चाहते आतुरतेने वाट पाहत आहे. (Ajay Purkar in South Film)