ankita walawalkar ganesh festival : कोकणात गणेशोत्सव म्हणजे धुमधडाकाच. कोकणातील गणेशोत्सवाला जाण्यासाठी सगळेच नेहमीच उत्सुक असतात. बऱ्याच आधीपासून त्यांची जय्यत तयारीही सुरु झालेली असते. अनेक कलाकार मंडळीही गणेशोत्सवासाठी गावाकडे जाताना दिसतात. कोकणचा गणेशोत्सव म्हटलं की एक नाव आवर्जून येत ते म्हणजे अंकिता वालावलकर. ‘बिग बॉस मराठी’ फेम आणि सोशल मीडिया इन्फ्लुएन्सर अंकिता वालावलकर कोकणातील गोष्टी सांगत नेहमीच चर्चेत असते. तिचे मालवणी भाषेतील संवाद नेहमीच साऱ्यांच्या पसंतीस पडतात. अशातच आता कोकणात गणेशोत्सवासाठी अंकिता वालावलकर पोहोचली असल्याचं पाहायला मिळालं.
काल अंकिताने शेअर केलेल्या व्हिडीओमध्ये ती नवऱ्यासह म्हणजेच कुणाल भगतसह सासरची म्हणजेच अलिबाग येथे गणेशोत्सवाची तयारी करत तिने माहेर म्हणजेच मालवण गाठलं. लग्नापूर्वीच अंकिताने कुणालला माहेरच्या गणपतीला दरवर्षी जायचं अशी अट घातली होती. आणि त्यानुसार कुणालनेही अंकिताला दिलेला शब्द पाळला. त्याने जावयाचे कर्तव्य पूर्ण केले. त्यानंतर अंकिता व कुणाल यांनी मालवणहुन त्यांचा दौरा अलिबागच्या दिशेने वळविला. आणि सूनेचं कर्त्यव्य अंकिताने पूर्ण केलं.
याचा व्हिडीओ अंकिताने शेअर केला आहे. आणि तिने म्हटलं आहे, “माहेरचा गणपती करुन आम्ही निघालोय आता घरी अलिबागला. माहेरचा गणपती म्हणजे जन्मापासून जो आपल्या डोळ्यांसमोर आहे, लहानपणापासून ज्याच्या आरतीत, गोंधळात आपण वाढलो. त्या आठवणी, ती ऊब, ती जबाबदारी म्हणजे माहेरचा गणपती. आणि सासरचा गणपती? तो फक्त देव नसतो, तर तो आपलं नवीन आयुष्य, नवीन घर आणि नवीन नात्यांचा धागा बनतो. माहेरच्या आठवणींना सोबत घेत आपण जेव्हा सासरच्या गणपतीकडे जातो, तेव्हा खरं तर आपल्याला दोन घरांचा आशीर्वाद मिळतो”.
पुढे ती म्हणाली, “एक घर आपल्याला जन्म देणारं, आणि दुसरं घर आपल्याला स्वीकारणारं. म्हणूनच माहेरचा गणपती ही जबाबदारी असते, तर सासरचा गणपती हे नात्यांचं समाधान आणि पूर्णत्व असतं. आणि मी हे दोन्ही आयुष्यभर सांभाळेन”. अंकिताचा हा व्हिडीओ सोशल मीडियावर व्हायरल झाला असून अनेकांनी याला पसंती दर्शविली आहे. आणि अंकिताचे तोंडभरुन कौतुक केले आहे.
