मराठी मनोरंजन विश्वात सध्या जोरदार लगीनघाई सुरु आहे. नुकताच प्रथमेश परब ही विवाहबंधनात अडकल्यानंतर आता पूजा सावंतदेखील विवाहबंधनात अडकणार आहे. अशातच छोट्या पडद्यावरील एक लोकप्रिय जोडीदेखील बोहोल्यावर चढायला सज्ज झाली आहे आणि ही लोकप्रिय जोडी म्हणजे अभिनेत्री तितीक्षा तावडे व अभिनेता सिद्धार्थ बोडके. नुकतेच या दोघांचे लग्नाआधीचे विधी पार पडले असून या विधींचे अनेक फोटो व व्हिडीओ सोशल मीडियावर व्हायरल झाले आहेत.
अशातच सिद्धार्थ व तितीक्षा हे दोघे आता लवकरच विवाहबंधनात अडकणार असून दोघांच्या लग्नाचा खास मंडपदेखील सज्ज झाला आहे. नयनरम्य ठिकाणी सिद्धार्थ व तितीक्षा यांचा विवाहसोहळा पार पडणार असून या मंडप सोहळ्यासाठी खास सजावटदेखील करण्यात आली आहे. रंगीबेरंगी पडदे अन् आकर्षक फुलांच्या माळांनी सिद्धार्थ व तितीक्षा यांच्या लग्नाचा मदनप सजवण्यात आला आहे. तसेच त्यांच्या लग्नमंडपातील फुलांनी सजवलेल्या गणपती बाप्पाच्या मूर्तीने साऱ्यांचेच लक्ष वेधून घेतले आहे.
नुकताच तितीक्षा व सिद्धार्थ यांचा साखरपुडा समारंभ सोहळा पार पडला. साखरपुड्यातील खास फोटोंनी सर्वांचं लक्ष वेधून घेतलं. यावेळी तितीक्षा व सिद्धार्थचा खास लूकही प्रेक्षकांना अधिक भावला. साखरपुड्यानंतर या दोघांचा हळदी समारंभ सोहळादेखील मोठ्या थाटात पार पडला. अनेक कलाकारांनीही सिद्धार्थ व तितीक्षाच्या हळदीत धमाल-मस्ती केलेली पाहायला मिळाली. शिवाय सिद्धार्थचा त्याच्या वडिलांबरोबरचा हळदीतील डान्सही तुफान व्हायरल होत आहे. हळदी समारंभासाठी दोघांनी पांढऱ्या रंगाचा पोशाख परिधान केला होता.
दरम्यान, संगीत, हळदी समारंभानंतर आता हे दोघे एकमेकांबरोबर विवाह करण्यासाठीदेखील सज्ज झाले आहेत. गेले अनेक दिवस या दोघांच्या लग्नाची चर्चा सोशल मीडियावर रंगली होती आणि अखेर आता ही जोडी विवाहबंधनात अडकणार आहे. त्यामुळे त्यांच्या अनेक चाहत्यांना दोघांच्या लग्नाची उत्सुकता लागून राहिली आहे.
