sudhir dalvi latest news : ‘शिर्डी के साई बाबा’ या टीव्ही मालिकेतील अभिनेते सुधीर दळवी सध्या रुग्णालयात दाखल आहेत. त्यांना सेप्सिस नावाच्या गंभीर आजाराने ग्रासले आहे. त्यांच्यावर उपचार सुरु असून, त्यासाठी १०-१५ लाख रुपयांची गरज आहे. ही माहिती समोर आल्यानंतर रणबीर कपूरची बहीण रिद्धिमा कपूर साहनी हिने मदतीचा हात पुढे केला आहे. तिने सोशल मीडियावर याबाबतची पोस्टही केली, मात्र यामुळे ती निशाण्यावर आली. पण ती गप्प बसली नाही आणि तिने सडेतोड उत्तर दिले. सुधीर दळवी यांचे वय ८६ वर्षे आहे. ते ८ ऑक्टोबर २०२५ पासून मुंबईतील लीलावती हॉस्पिटलमध्ये दाखल आहेत.
हॉस्पिटलमध्ये त्यांच्यावर सेप्सिसवर उपचार सुरु आहेत, जो एक जीवघेणा संसर्ग आहे. त्यांची प्रकृती गंभीर असल्याचे सांगण्यात येत आहे. रिपोर्ट्सनुसार, उपचाराचा खर्च आधीच १० लाख रुपयांच्या पुढे गेला आहे आणि उपचार सुरु राहिल्यास १५ लाखांपर्यंत पोहोचू शकतो. सुधीर दळवी यांच्या कुटुंबीयांनी चाहते आणि इंडस्ट्रीकडे मदतीची विनंती केली होती. यानंतर रणबीर कपूरची बहीण रिद्धिमा कपूर मदतीसाठी पुढे आली.
याबाबत तिने एक पोस्ट शेअर केली आहे. तिने लिहिले, “झाले आहे, मी त्याला लवकर बरे होण्यासाठी शुभेच्छा देतो”. मात्र, एका युजरने प्रश्न केला की, “जर त्यांनी दान केले तर मग त्यांनी हे पोस्ट करुन का दिखावा केला”. एकाने लिहिले आहे, “तुम्ही मदत केली तर इथे का उल्लेख केला… फुटेज हवे आहे?”. ट्रोल झाल्यानंतर रिद्धिमाने सडेतोड उत्तर दिले आणि लिहिले, “आयुष्यातील प्रत्येक गोष्ट दिसण्याबद्दल नसते. एखाद्या गरजूला मदत करणे आणि आपण जे काही करु शकतो तो सर्वात मोठा आशीर्वाद आहे”.
