बरेचदा कलाकारांच्या कामाचं कौतुक केलं जात तर काही वेळेला त्यांना त्यांच्या कामाची पोचपावती देखील दिली जात नाही. यावरुन अनेक कलाकारांनी आजवर वाचा फोडली आहे. तर काहींनी याकडे दुर्लक्ष केलं आहे. लोकप्रिय मराठी गायक सलील कुलकर्णी यांच्या एका गाण्याच्या व्हायरल झालेल्या व्हिडीओवर त्यांनी प्रतिक्रिया देत पोस्ट शेअर केली आहे. (Saleel Kulkarni Post)
बॉलिवूडचा बादशाह शाहरुख खानची लेक सुहाना खान डान्स करतानाचा एक व्हिडीओ चांगलाच व्हायरल होतं आहे. या व्हिडीओमध्ये ती चक्क मराठी गाण्यावर नाचताना दिसत आहे. सलील कुलकर्णी यांनी गायलेल्या मराठी बालगीत ‘एका माकडाने काढलं दुकान’वर ती डान्स करत आहे. एका नेटकऱ्याने सुहानाच्या ‘आर्चिज’ या चित्रपटातील डान्स व्हिडीओवर हे गाणं हुबेहूब बसवलं आहे. हा व्हिडीओ पाहायला मजेशीर वाटत आहे. हा व्हिडीओ पाहून सलील कुलकर्णी यांनी एक पोस्ट शेअर करत प्रतिक्रिया दिली आहे.
हा व्हिडीओ शेअर करत, “‘एका माकडाने काढले दुकान, आली गिऱ्हाईके छान छान’, विंदांच्या या कवितेचं मी १९९९मध्ये गाणं केलं होतं. आत्ताची धृपद गायिका मेघना सरदार तेव्हा १०-११ वर्षांची होती, तिने हे गाणं गायलं होतं. लहान मुलांच्या अनेक पिढ्यांनी हे गाणं मनापासून ऐकलं. या गाण्याला दाद दिली. नंतर अनेक माध्यमांनी हे उथळ हिंदी भाषांतर करुन माझ्याच चालीत प्रदर्शित केलं. मी अर्थातच निषेधसुद्धा नोंदवलेला नाही. मग हळूहळू मराठीतल्या पण अनेक माध्यमांनी विंदा किंवा माझा उल्लेख न करता हे गाणं वाजवलं. त्याचा व्हिडीओ केला. पुन्हा एकदा जगभरातील मुलांनी ऐकलं, त्यांना आवडलं हे खूप आहे असा समजूतदार (खरं तर बावळट आणि आळशी) धोरण स्वीकारलं” असं म्हणत त्यांनी नाराजी व्यक्त केली आहे.
यापुढे त्यांनी लिहिलं आहे की, “आता काही दिवसांपूर्वी हे गाणं या धमाल एडिटिंग सह पाहायला मिळालं. ते सुद्धा व्हायरल झालं. आता तर मी निषेध वगैरे ओलांडून हसण्याच्या स्टेजला आलो आहे. विंदांच्या घरी बसून त्यांना हे गाणं ऐकवलं होतं. त्यांनी हा व्हिडीओ पाहिला असता तर ‘माझ्या मना बन दगड’ नावाची त्यांची कविता ऐकवायला त्यांना अजून एक कारण सापडले असते. तर, ‘एका माकडाने काढले दुकान’ या गाण्याचा प्रवास गमतीशीर चालू आहे. आजची छोटी मुलं सुद्धा ते गाणं ऐकात आहेत. विंदा. आपल गाणं हिट आहे” असं म्हणत या एडिट केलेल्या गाण्याचा आस्वाद घेतला आहे. या पोस्टवर कलाकारांसह नेटकऱ्यांनीही मजेशीर प्रतिक्रिया दिलेल्या पाहायला मिळत आहेत.
