मराठी संगीत विश्वातील सध्याच्या काही आघाडीच्या गायक जोडींपैकी एक लोकप्रिय जोडी म्हणजे गायक रोहित राऊत व गायिका जुईली जोगळेकर. ‘सारेगमप’ या लोकप्रिय गाण्याच्या शोमधून लोकप्रियता मिळवत त्याने मराठीसह हिंदी रसिक श्रोत्यांनाही मंत्रमुग्ध केले आहे. जुईली जोगळेकर व रोहित राऊत यांनी याआधी काही संगीत स्पर्धांमधून तसंच गाण्यांच्या कार्यक्रमांमधून एकत्र गाणी गायली आहेत. महाराष्ट्रभरात अनेक म्युझिक कॉन्सर्ट्समधून रोहित-जुईलीने रसिक श्रोत्यांना आपल्या आवाजाने मंत्रमुग्ध केले आहे.
जुईली व रोहित गायनाचे विविध कार्यक्रम घेत नेहमीच प्रेक्षकांच्या मनावर राज्य करत असतात. दोघांनीही त्यांच्या गोड आवाजाने स्वतःचा असा चाहतावर्ग निर्माण केला आहे. शिवाय दोघेही सोशल मीडियावरुनही अनेकदा एकत्र गाणी गाताना दिसतात. रोहित व जुईली यांची अनोखी केमिस्ट्री कायमच प्रेक्षकांना भावते. दोघे सोशल मीडियावरही बऱ्यापैकी सक्रिय असतात. आपले अनेक फोटो व गाण्याचे व्हिडीओ शेअर करत ते चाहत्यांच्या संपर्कात राहतात.
अशातच काही दिवसांपूर्वी रोहित-जुईलीने त्यांच्या सोशल मीडियाद्वारे एक खास पोस्ट शेअर करत त्यांच्या आगामी नवीन गाण्याबद्दल पोस्ट शेअर केली होती. दोघांनीही त्यांच्या इन्स्टाग्राम अकाऊंटद्वारे त्यांच्या आगामी गाण्याच्या रेकॉर्डिंगदरम्यानचे खास फोटो पोस्ट केले होते. तेव्हापासून त्यांच्या अनेक चाहत्यांना या नवीन गाण्याविषयी उत्सुकता लागली होती. अशातच आता ही उत्सुकता संपली आहे. रोहित व जुईली लवकरच एक होळीनिमित्त खास गाणं घेऊन चाहत्यांच्या भेटीला येत आहेत.
मीडिया वन सोल्यूशन्स प्रस्तुत आणि इट्स मज्जा ओरिजिनल हे होळीनिमित्त प्रेक्षकांसाठी खास गाणं घेऊन येणार आहेत. या होळी स्पेशल गाण्याचे नाव ‘तू माझी पुरणपोळी रे’ असं असून हे खास गाणं रोहित व जुईली यांनी गायलं आहे. लवकरच हे गाणं रसिक श्रोत्यांच्या भेटीला येणार असून या गाण्याविषयी चाहत्यांमध्येही चांगलीच उत्सुकता पाहायला मिळत आहे.
