Garbage Collector Passed 10th Exam : पूर्वीपेक्षा शिक्षणाला आता अधिक महत्त्व आहे. सुरुवातीला बेताच्या परिस्थितीमुळे शिक्षण घेणं अनेकांना साध्य होत नव्हते. मात्र, आता सरकारच्या अनेक सुख सुविधांमुळेशिक्षण घेणं प्रत्येकाला शक्य झालं आहे. शिक्षणाला वयाचं, परिस्थीतीचं कशाचंच बंधन नसतं असं अनेकदा बोललं जातं. हे वाक्य सत्यात उतरवलंय पुण्यातील कात्रज परिसरातील स्वच्छता कर्माचारी असणाऱ्या प्रियांका कांबळे यांनी. घराघरातून कचरा उचलण्याचं कष्टाचं काम, मुलाची जबाबदारी, वैयक्तिक आयुष्यातील चढ-उतार या साऱ्यांशी दोन हात करत त्या दहावीची परीक्षा उत्तीर्ण झाल्या आहेत. कुठलीही नवीन गोष्ट शिकण्यासाठी वय नाही तर जिद्द आणि इच्छाशक्तिची गरज असते हे या सफाई कर्मचारी असलेल्या ताईंनी सिद्ध करुन दाखवलं आहे.
दहावीच्या परीक्षेत ४७.६० टक्के गुण मिळवून त्या उत्तीर्ण झाल्या असून, त्यांचे सर्वत्र कौतुक होत आहे. श्रीमती रमाबाई रानडे प्रौढ स्त्री हायस्कूल सेवासदन येथे त्यांनी शिक्षण घेतलं. नवऱ्यात आणि त्यांच्यात होणाऱ्या सततच्या मतभेदामुळे त्यांनी सासर सोडलं आणि त्या आईकडे लेकासह राहायला आल्या आणि त्यांच्या आयुष्याला कलाटणी मिळाली. स्वतःसाठी काहीतरी करायला हवे ही खंत त्यांना शांत बसू देत नव्हती तेव्हा त्यांनी शिक्षण पूर्ण करण्याचा निर्णय घेतला. या त्यांच्या निर्णयाला त्यांच्या आईने पूर्णपणे पाठिंबा दिला. तिचा दहावीचा निकाल ऐकून साऱ्यांच्या चेहऱ्यावर आनंद ओसंडून वाहताना पाहायला मिळाला.
आणखी वाचा – तीन वर्षांची असताना अॅसिड हल्ला, दृष्टी गेली अन् ‘ति’ने १२वीमध्ये मिळवले ९५ टक्के
हा अनुभव शेअर करत प्रियांका कांबळी म्हणाल्या की, “लहान असताना मी शिक्षण सोडून दिलं होतं. तेव्हा शिक्षणाचं महत्त्व काय आहे हे कळलं नव्हतं. मात्र, जसजसे मोठं होत गेले तेव्हा शिक्षणाचं महत्त्व कळालं. असं म्हणतात शिक्षणाला कोणतंही वय नसतं आणि हीच बाब लक्षात घेत मी शिक्षण पूर्ण करण्याचा विचार केला आणि श्रीमती रमाबाई रानडे प्रौढ स्त्री हायस्कूल येथे आठवीपासून शिक्षण घ्यायला सुरुवात केली. मी महापालिकेत कात्रज परिसरात स्वच्छतेचं काम करते. हे काम करुन मी शिक्षण पूर्ण केलं आहे”.
आणखी वाचा – “सासूबाईंमुळे एकत्र राहतो नाहीतर…”, गोविंदाच्या बायकोचं मोठं वक्तव्य, म्हणाली, “कोणाची नजर लागली आणि…”
“सकाळी परिसरातील नागरिकांच्या घरी जाऊन कचरा गोळा करुन, मुलाला शाळेत सोडून मी माझ्या शाळेत जात होते. दहावीच्या परीक्षेला देखील मी कामावर जाऊन परीक्षेला जात होते. या काळात मला माझ्या आईने मदत केली. पास झाल्यानं मला खूपच आनंद होत आहे”, असं यावेळी प्रियांका कांबळे हिनं सांगितलं. प्रियंका यांच्या या यशाने इतर महिलांसमोर एक प्रेरणादायी उदाहरण ठेवले आहे. शिक्षणाच्या माध्यमातून स्वतःला सक्षम बनवण्याचा त्यांचा प्रवास अनेकांसाठी प्रोत्साहन आहे.
