Premachi Goshta Marathi Serial : मराठी मालिकाविश्वातील लोकप्रिय चेहऱ्यापैकी एक म्हणजे अभिनेत्री तेजश्री प्रधान. तेजश्री प्रधानने आजवर अनेक मालिकांमधून मध्यवर्ती भूमिका साकारत प्रेक्षकांच्या मनावर राज्य केलं. दर्जेदार व हिट मालिकांमधून तेजश्री नेहमीच घराघरांत पोहोचली. ‘होणार सून मी या घरची’ ही मालिका विशेष गाजली. याशिवाय तेजश्रीने अनेक हिट चित्रपटांमधूनही महत्त्वपूर्ण भूमिका करत प्रेक्षकांची मन जिंकली. काही दिवसांपूर्वीच अभिनेत्रीचा तदैव लग्नम हा चित्रपट प्रदर्शित झाला. आता अभिनेत्री ‘स्टार प्रवाह’ वाहिनीवरील ‘प्रेमाची गोष्ट’ या मालिकेत मुक्ता ही मध्यवर्ती भूमिका साकारत होती. गेल्या काही दिवसांपासून अभिनेत्री तेजश्री प्रधानने ‘प्रेमाची गोष्ट’ या मालिकेतून एक्झिट घेतल्याच्या चर्चा सुरु आहेत.
अभिनेत्रीने अचानक मालिका सोडण्याचा निर्णय का घेतला याबाबत अद्याप कोणतीही माहिती समोर आलेली नाही. पण, तेजश्रीच्या ऐवजी आता मुक्ताच्या रुपात सेटवर नव्या अभिनेत्रीची एन्ट्री झाली असल्याचं समोर आलं आहे. तेजश्रीने मालिकेतून एक्झिट घेतल्यावर अभिनेत्री स्वरदा ठिगळे मुक्ताच्या भूमिकेत झळकणार असल्याचं बोललं जात होतं. अखेर स्वरदाने सेटवरचा पहिला फोटो शेअर करत या वृत्ताला दुजोरा दिला आहे. “नवीन वर्ष, नवीन सुरुवात” असं कॅप्शन देत अभिनेत्रीने मालिकेच्या स्क्रिप्टचा फोटो सोशल मीडियावर शेअर केला आहे.
स्वरदाने हा फोटो पोस्ट केला आहे त्यामधील या स्क्रिप्टमध्ये इंद्रा, लकी, मुक्ता यांची नावं स्पष्टपणे दिसत आहेत. यावरुन स्वरदाच मालिकेत मुक्ताचं पात्र साकारणार यावर शिक्कामोर्तब झालेलं आहे. या मालिकेतून तेजश्रीने छोट्या पडद्यावर कमबॅक केलं. या मालिकेमुळे तेजश्रीला चाहत्यांचा विशेष प्रेम मिळालं. आणि टीआरपीच्या शर्यतीतही ही मालिका अव्वल असलेली पाहायला मिळाली. आता मात्र मालिकेतील तेजश्रीच्या एक्झिटमुळे तिचा चाहतावर्ग नाराज असल्याचं दिसतंय.
यापुढे ‘प्रेमाची गोष्ट’ या मालिकेत मुक्ता ही भूमिका स्वरदा ठिगळे साकारणार आहे. अभिनेत्रीच्या कामाबद्दल सांगायचं झालं तर २०१३ मध्ये प्रसारित होणाऱ्या ‘माझे मन तुझे झाले’ या मालिकेमुळे ती प्रसिद्धीझोतात आली. २०१७ मध्ये तिने हिंदी मालिकेत काम केलं होतं. याशिवाय ‘स्वराज्य सौदामिनी ताराराणी’ या मालिकेत स्वरदा प्रमुख भूमिकेत झळकली होती. आता लवकरच स्वरदा प्रेक्षकांना मुक्ताच्या भूमिकेत दिसेल.
