छोट्या पडद्यावरील ‘जुळून येती रेशीमगाठी’ मालिकेद्वारे प्रेक्षकांशी रेशीमगाठ जुळवत त्यांच्या मनावर राज्य करणारी अभिनेत्री म्हणजे प्राजक्ता माळी. प्राजक्ताने मराठी मालिका, चित्रपट यांसह अनेक कार्यक्रमांद्वारे सूत्रसंचालन करत प्रेक्षकांचे मनोरंजन केले आहे. आपल्या अभिनय व उत्तम सूत्रसंचालनाद्वारे चर्चेत असणारी अभिनेत्री तिच्या सोशल मीडियाद्वारे ही तितकीच चर्चेत राहत असते. सोशल मीडियाद्वारे प्राजक्ता नेहमीच तिचे हटके व स्टायलिश फोटो शेअर करत असते.
आपल्या मनमोहक सौंदर्याने व निरागस हास्याने चर्चेत राहणारी ही अभिनेत्री नुकतीच तिच्या एका इन्स्टाग्राम व्हिडीओमुळे चर्चेत आली आहे. अभिनेत्री सध्या कामाच्या व्यस्ततेमधून वेळ काढत तिच्या मामाच्या गावाला गेली आहे. प्राजक्ता तिच्या मामाच्या गावी म्हणजेच पंढरपूरला गेली असून तिकडच्या कावड परंपरेत तिने सहभाग घेतला आहे. प्राजक्ताने तिच्या मामाच्या गावच्या कावड परंपरेचा एक खास व्हिडीओही शेअर केला आहे. या व्हिडीओमध्ये प्राजक्ताचे सगळे कुटुंबीय दिसत असून प्राजक्ता तिच्या लाडक्या भाचींसह एन्जॉय करतानाचेही या व्हिडीओमध्ये पाहायला मिळत आहे.
प्राजक्ताने पंढरपुरातील कावड प्रथेचा एक खास व्हिडीओ शेअर करत त्याखाली त्याविषयी माहितीही दिली आहे. यामध्ये तिने असं म्हटलं आहे की, “२ मित्र मैत्रीत एकमेकांना वचन देतात, “आपण नाही राहिलो तरी जोवर चंद्र-सुर्य आहेत तोवर आपली मैत्रीची आठवण राहील. ही कावड चालू राहील. त्यांनी दिलेलं वचन हे गावकरी गेली ५-६ पिढ्या निगुतीनं पाळतायेत; ही कावड आजही चालू आहे आणि दोन समाजांमधील प्रेम अबाधित आहे. सगळी कामं बाजूला ठेवून सगळे कावडीला खांदा द्यायला सगळे धावून येतात”. प्राजक्ताने शेअर केलेल्या या व्हिडीओमध्ये तिची कुटुंबियांबरोबरची धमाल मजामस्ती पाहायला मिळत आहे.
दरम्यान, तिने शेअर केलेल्या या व्हिडीओला तिच्या चाहत्यांनी लाईक्स व कमेंट्स करत चांगलाच प्रतिसाद दिला आहे. तसेच गावच्या प्रथा-परंपरेत अभिनेत्रीने घेतलेल्या सहभागानिमित्त तिच्या अनेक चाहत्यांनी तिचे कौतुकही केले आहे. खूप छान, खूपच कमाल, मातीशी नाळ जोडून राहलेली कलाकार, आपल्या मातीशी नातं घट्ट करणाऱ्या काही गोष्टी तू अजूनही पाळतेस हे बघून खूपच छान वाटलं, पंढरपूरची नात” अशा अनेक कमेंट्स करत तिचे कौतुक केले आहे.
