आपल्या मनमोहक हास्याने व मनमोहक सौंदर्याने मराठीसह हिंदी प्रेक्षकांवर मोहिनी घालणारी मराठमोळी ‘कलरफुल’ अभिनेत्री म्हणजे पूजा सावंत. ‘मन धागा धागा जोडते नवा’ म्हणत पूजाने मराठीसह हिंदी सिनेविश्वातदेखील तिच्या अभिनयाचा वेगळा चाहतावर्ग निर्माण केला आहे. आपल्या अभिनयाने व हटके स्टाईलमुळे चर्चेत राहणारी पूजा तिच्या लग्नामुळे चांगलीच चर्चेत आली. दोन महिन्यांपूर्वी २८ फेब्रुवारी रोजी पूजाने सिद्धेश चव्हाणसह लग्नगाठ बांधली.
लग्नानंतर पूजा तिच्या नवऱ्यासह ऑस्ट्रेलियाला गेली असून ती तिथे नवऱ्यासह लग्नानंतरचे काही खास क्षण एन्जॉय करताना दिसत आहे. पूजाचा नवरा हा मूळचा भारतातला असला तरी तो ऑस्ट्रेलियात कामानिमित्त राहतो पूजाने तिच्या नवऱ्याबरोबर ऑस्ट्रेलियाला एन्जॉय करतानाचे काही खास क्षण सोशल मीडियाद्वारे शेअर केले आहेत. अशातच आज पूजाच्या नवऱ्याचा वाढदिवस आहे आणि त्याच्या वाढदिवसानिमित्त पूजाने खास व्हिडीओ शेअर करत नवऱ्याला शुभेच्छा दिल्या आहेत.
आणखी वाचा – कर्ज फेडण्यासाठी प्राजक्ता माळी करत आहे वेगवेगळं काम, स्वतःच शेअर केला व्हिडीओ, म्हणाली, “कर्जासाठी सगळं…”
पूजाने नवऱ्याला वाढदिवसानिमित्त शुभेच्छा देत असं म्हटलं आहे की, “ज्याने माझे आयुष्य खऱ्या अर्थाने उजळले आणि माझे हृदय हे नितांत प्रेमाने भरले त्याला वाढदिवसानिमित्त खूप खूप शुभेच्छा. यापुढेही आपल्याला अशी अनेक वर्ष एकत्र राहायचं आहे. पुन्हा एकदा वाढदिवसाच्या शुभेच्छा सिद्धेश.” पूजाने शेअर केलेल्या या व्हिडीओला चाहत्यांनी लाईक्स व कमेंट्सद्वारे चांगलाच प्रतिसाद दिला आहे. त्याचबरोबर पूजाच्या नवऱ्याला वाढदिवसानिमित्त शुभेच्छाही दिल्या आहेत.
दरम्यान, पूजाचा होणार नवरा सिद्धेश चव्हाण सध्या भारतात राहत नसून ऑस्ट्रेलियातील एका फायनान्स कंपनीत काम करतो. मात्र तो मूळचा मुंबईचा आहे. कामानिमित्त तो काही काळ ऑस्ट्रेलियात राहत आहे आणि पूजादेखील लग्नानंतरचा खास वेळ नवऱ्याबरोबर एकत्र घालवत आहे.