बॉलिवूड अभिनेता नसीरुद्दीन शाह सध्या ‘द काश्मीर फाईल्स’ व ‘गदर 2’ चित्रपटावर केलेल्या वक्तव्यांमुळे चर्चेत आले आहेत. या चित्रपटांना प्रेक्षकांकडून भरभरून प्रतिसाद मिळाला. हे चित्रपट मोठ्या प्रमाणावर लोकप्रिय होत आहेत हे पाहून त्रास होतोय असं वक्तव्य एका अभिनेत्याने केले. यावरून चित्रपट निर्माते विवेक अग्निहोत्री यांनीही अभिनेत्याच्या या विधानावर जोरदार प्रहार केला. विवेक यांनी असं म्हटलं की, अनुभवी अभिनेत्याला कदाचित फक्त दहशतवाद्यांचे समर्थन करणे आवडते. विवेक अग्निहोत्रीच्या ‘द व्हॅक्सिन वॉर’ या चित्रपटात मराठमोळे अभिनेते नाना पाटेकर दिसणार आहेत. त्यांना या वक्तव्या प्रकरणी विचारण्यात आले, तेव्हा त्यांनी सडेतोड भाष्य केलेलं पाहायला मिळालं. हे वक्तव्य करणारा अभिनेता म्हणजे नसीरुद्दीन शाह. (Nana Patekar Reacted On Naseeruddin Shah)
नाना पाटेकर यांना नसीरुद्दीन शाहांच्या वक्तव्याबद्दल त्यांचं मत विचारण्यात आलं. त्यावर नाना म्हणाले, “तुम्ही नसीर यांना विचारलं होतं का की त्यांच्यासाठी राष्ट्रवाद म्हणजे काय? माझ्या मते, राष्ट्रावर प्रेम दाखवणे हा राष्ट्रवाद आहे आणि ती वाईट गोष्ट नाही,” असं ते म्हणाले. “’गदर’ हा चित्रपट ज्या प्रकारचा आहे, त्यात तसा आशय असेल आणि मी ‘द केरला स्टोरी’ पाहिला नाही, त्यामुळे मी त्यावर भाष्य करू शकत नाही. “राष्ट्रवादाच्या नावाखाली लोकांनी पैसे कमावणे योग्य नाही, सत्य घटनांवर चित्रपट बनवताना त्यांनी वस्तुस्थिती लक्षात ठेवली पाहिजे,” असंही नाना पाटेकर यांनी नमूद केलं.
नसीरुद्दीन शाह यांनी केलेलं वक्तव्य असं होत की, “मी ‘द केरला स्टोरी’ किंवा ‘गदर २’सारखे चित्रपट पाहिलेले नाहीत. पण त्यात नेमकं काय दाखवलं जात आहे ते मला चांगलंच ठाऊक आहे. ही फार चिंताजनक बाब आहे की ‘द काश्मीर फाइल्स’सारखे चित्रपट हिट होत आहेत, पण सुधीर मिश्रा, अनुभव सिन्हा, हंसल मेहता यांचे चित्रपट प्रेक्षक पाहत नाहीत. त्यामुळे या दिग्दर्शकांनी या गोष्टींमुळे न डगमगता त्यांचे चित्रपट लोकांसमोर आणायला पाहिजेत असं मला वाटतं,” असं नसीरुद्दीन शाह म्हणाले होते.
आणखी वाचा – प्रभासच्या ‘सालार’ चित्रपटाची तारीख पुढे ढकलली, निर्मात्यांकडून मोठी घोषणा
नाना पाटेकर लवकरच विवेक अग्निहोत्री यांच्या ‘द व्हॅक्सिन वॉर’ या चित्रपटात दिसणार आहेत, जिथे ते कोविड लसीचे निर्माते डॉ. भार्गव यांची भूमिका साकारणार आहेत. याशिवाय त्यांनी अनिल शर्माचा आगामी चित्रपट ‘जर्नी’ देखील साइन केला असल्याचं समोर आलं आहे.