Vijay Kadam Died : मराठी कलाविश्वातून सर्वांना धक्कादायक बातमी समोर आली. ज्येष्ठ अभिनेते विजय कदम यांचे कर्करोगाच्या आजाराने निधन झाले आहे. मराठी चित्रपट, मालिका तसेच रंगभूमीवर छोट्या भूमिकांपासून मुख्य नायकांपर्यंतच्या सर्व भूमिका अगदी लीलया पार पाडणारे ज्येष्ठ अभिनेते विजय कदम यांनी आज अखेरचा श्वास घेतला. गेल्या काही दिवसांपासून ते आजारी होते. कर्करोगामुळे त्यांना अनेक कठीण प्रसंगाचा सामना करावा लागला. पण अखेरीस कर्करोगाशी सुरु असलेली त्यांची झुंज अपयशी ठरली. त्यांच्या पार्थिवावर आज दुपारी दोन वाजता ओशिवरा अंधेरी येथील स्मशानभूमीत अंत्यसंस्कार होणार आहेत. ‘रथचक्र’, ‘टुरटूर’ यांसारख्या नाटकांमधून आपल्या अभिनयाची छाप पाडणाऱ्या विजय कदम यांनी १९८०च्या दशकात लहानसहान विनोदी भूमिका साकारुन आपल्या कारकीर्दीला सुरुवात केली.
आपल्या अभिनयाने चर्चेत राहणारे विजय कदम काही काळ मनोरंजन सृष्टीपासून लांब होते आणि याचं कारण म्हणजे त्यांचं आजारपण. विजय कदम यांनी कर्करोगाशी यशस्वी झुंज दिली. विजय कदम यांनी बालकलाकार म्हणून सिनेविश्वात पदार्पण केले. ‘राजा भिकारी माझी टोपी चोरली’ या बाल नाटकात हवालदाराची भूमिका साकारुन त्यांनी रंगभूमीवर पदार्पण केले. त्यानंतर सिनेविश्वात त्यांनी त्यांचा अभिनयाचा प्रवास सुरुच ठेवला. विनोदी अभिनयाने त्यांनी आजवर प्रेक्षकांना खळखळवून हसवले. आज हा हास्यवीर काळाच्या पडद्याआड गेला आहे.
विजय कदम यांच्या निधनाच्या बातमीने सिनेसृष्टीत शोककळा पसरली आहे. विजय कदम यांनी काही दिवसांपूर्वीच ‘इट्स मज्जा’शी संवाद साधला. ‘इट्स मज्जा’च्या ‘ठाकूर विचारणार’ या मुलाखतीच्या कार्यक्रमात त्यांनी त्यांच्या आजारपणाबद्दल व या आजारपणातल्या त्यांच्या संघर्षाबद्दल सांगितले.
यावेळी विजय कदम यांनी असं म्हटलं की, “याचे सगळे श्रेय माझी पत्नी व माझा मुलगा गंधार यांची साथ मिळाली. हे दोघे माझ्यामागे खंबीरपणे उभे राहिले. तसंच हे एक वाईट स्वप्न समजून मी यातून लवकर बाहेर पडलो. शक्यतो यातून लवकर बाहेर पडत नाहीत. पण मी पडलो आणि नशिबाने चांगले डॉक्टर मिळाले. त्यांच्या मार्गदर्शनामुळे व माझ्या पत्नीच्या साथीमुळे मी यावर यशस्वी मात करु शकलो असं मला वाटतं”
