Marathi Youth Clashesh With UP Cab Driver : महाराष्ट्रात सध्या मराठी भाषा बोलणे सक्तीची आहे यावरुन बरेच वाद होताना पाहायला मिळत आहेत. मनसे अध्यक्ष राजसाहेब ठाकरे यांच्या संभाषणातील मराठी सक्तीची हा मुद्दा अनेकांनी उचलून धरलेला दिसत आहे. मुंबईतील अनेक भागांत मराठी विरुद्ध हिंदी भाषा यावरुन आजवर अनेक खटके उडाले आहेत. आणि याचे अनेक व्हिडीओ सोशल मिडियावर तुफान व्हायरल होताना पाहायला मिळत आहेत. इतकंच नाही तर हा वाद आता चिघळत जात हिसंक वळण घेतानाही पाहायला मिळत आहे. भाषेच्या मुद्द्यावरुन मारामारी झाल्याचा एक व्हिडीओ समोर आला आहे. ज्यात मराठी भाषा बोलण्यावरुन एका कॅब चालकांमध्ये आणि मराठी माणसांत जोरदार वाद झाला. सध्या हा वाद तुफान व्हायरल होताना पाहायला मिळत आहे. सोशल मीडियावर व्हायरल होणाऱ्या या व्हिडीओमध्ये, एका तरुणाने ऑनलाइन कॅब बुक केली असल्याचं दिसत आहे.
कॅब चालकाने त्याची राईड रिक्वेस्ट स्वीकारली. मात्र चालक कॅब घेऊन पाच मिनिटं उशिरा पोहोचला. आणि यानंतर तर चालकाने हद्द पार केली. उशिरा पोहोचल्यानंतर त्याने मला जायचं नाही असं सांगण्यास सुरुवात केली. तर व्हिडीओमध्ये असं कळलं की, मराठी तरुणाच्या म्हणण्यानुसार, चालक त्याच्या डोळ्यांसमोरच कॅबमध्ये बसून होता, पाच मिनिटे उशिरा येऊन शेवटी त्याने राईडच रद्द केली. यावर चिडून मराठी तरुणाने त्याला जाब विचारला. जर तुला जायचं नव्हतं मग राईड रिक्वेस्ट का स्वीकारलीस? त्यावर कॅब चालकाने उडवाउडवीची उत्तरं देण्यास सुरुवात केली, त्यामुळे तरुण संतापला आणि वादाला सुरुवात झाली.
Kalesh b/w a Cab driver and Passenger (UP based Ola driver beaten for coming late 5 minutes and cancelling ride despite speaking Marathi) pic.twitter.com/1N8Ee8ENIQ
— Ghar Ke Kalesh (@gharkekalesh) May 15, 2025
या वादाला काही वेळातच मराठी विरुद्ध हिंदी असे वळण मिळाले. कारण चालक हा उत्तर भारतीय होता आणि तो सुरुवातीला हिंदी भाषेत उत्तर देत होता. व्हिडीओ शूट करत तो तरुण कॅब चालकाला खडसावतानाही दिसला. कॅब चालक ही त्या तरुणाला “तुम्हाला जे करायचं ते करा, मला काहीच फरक नाही”, असा उर्मट भाषेत उत्तर देताना दिसला. यावर त्या तरुणाने कॅब चालकाला धमकावले. “तुझी आरटीओमध्ये तक्रार करु का?”, असं विचारलं. यावर त्या चालकाने उत्तर देत, “जा कर तक्रार”, असं म्हटलं.
उलट उत्तर मिळताच आणि कसलीच भीती नाही हे समजताच हा वाद पेटला. त्या मराठी तरुणाने आणि त्याच्याबरोबर असलेल्या लोकांनी कॅब चालकाला बाहेर काढत मारण्यास सुरुवात केली. शेवटी घाबरुन तो कॅब चालक गाडी तिथेच सोडून पळून जाताना दिसला. हा व्हिडीओ gharkekalesh या अकाउंटवरुन सोशल मिडियावर पोस्ट करण्यात आला आहे. ज्यावर लोकांनी कमेंट करत तीव्र शब्दांत संताप व्यक्त केला आहे. मराठी भाषेच्या नावाखाली गुंडगिरी सुरु असल्याचंही अनेकांनी कमेंटमध्ये म्हटलं आहे.
