जगभरात चर्चेत असणारा ९६वा ऑस्कर पुरस्कार सोहळा अगदी दिमाखात पार पडला. लॉस एंजेलिस येथील डॉल्बी थिएटरमध्ये हा सोहळा संपन्न झाला. जगभरातील दिग्गज कलाकारांनी या सोहळ्याला हजेरी लावली होती. या सोहळ्यामध्ये ‘ओपनहायमर’ या चित्रपटाला १३ श्रेणींमध्ये नामांकने मिळाली आहेत. या सोहळ्यात अनेक कलाकारांना मनोरंजनसृष्टीतील कामगिरीसाठी ऑस्कर पुरस्काराने गौरविण्यात येते. यावेळी भारतातील एकही चित्रपट ऑस्करसाठी शॉर्टलिस्ट झाला नाही. गेल्या वर्षी भारताला दोन ऑस्कर मिळाले. (Pushkar Jog On Oscar)
‘ओपेनहायमर’ या चित्रपटाने यंदाच्या पुरस्कार सोहळ्यात बाजी मारली. या चित्रपटामधील नायकाची भूमिका साकारणाऱ्या सिलियन मर्फीला सर्वोत्कृष्ट अभिनेत्याचा पुरस्कार देऊन सन्मानित करण्यात आले. तर सर्वोत्कृष्ट अभिनेत्याचा ऑस्कर पुरस्कार जिंकणारा सिलियन मर्फी हा पहिला आयरिश अभिनेता ठरला. सिलियनच्या या बातमीची पोस्ट पुष्करने त्याच्या अधिकृत इन्स्टाग्राम स्टोरीवर शेअर केली आहे.
पुष्करने सिलियनचा एक फोटो शेअर करत त्याखाली कॅप्शन देत लिहिले आहे की, “मीही त्याच वाटेवर चालत आहे. लवकरच मराठी चित्रपटही ऑस्कर जिंकेल. कदाचित तो चित्रपट माझा असेल किंवा दुसऱ्या कोणाचाही असेल; पण मराठी चित्रपट लवकरच ऑस्कर जिंकेल”, अशी आशा त्याने व्यक्त केली आहे. नेहमीच पुष्कर कोणत्या ना कोणत्या वक्तव्यांमुळे चर्चेत असतो. अशातच पुष्कर ऑस्करला घेऊन केलेलं हे विधानही चर्चेत आलं आहे.
व्हिक्टोरिया’, ‘बाप माणूस’, ‘मुसाफिरा’, ‘अदृश्य’ अशा अनेक चित्रपटांमध्ये दिग्दर्शक व अभिनेता अशा दुहेरी भूमिका साकारत त्याने प्रेक्षकांची मन जिंकली. लवकरच पुष्कर ‘जबरदस्त-२’ या त्याच्या आगामी चित्रपटाची घोषणा करणार आहे. याबाबतची स्टोरी त्याने सोशल मीडियावर शेअर केली आहे. “जबरदस्त-२ या चित्रपटाची कथा मी नुकतीच ऐकली. त्यासाठी मी खूप आनंदी आणि आशावादी आहे,” अशी कॅप्शन त्याने या स्टोरीला दिली.
