Priya Berde Shared Emotional Post : मराठी सिनेसृष्टीतील लोकप्रिय व हरहुन्नरी अभिनेते म्हणजे लक्ष्मीकांत बेर्डे होय. या अवलियाने आपल्या अनोख्या शैलीच्या जोरावर लोकांना अक्षरशः वेड लावलं होतं. या अभिनेत्याला वृद्धांपासून ते लहान मुलांपर्यंत सर्वजण ‘लक्ष्या’ या नावानेच ओळखतात. कारण हा अभिनेता सर्वसामान्य लोकांना आपलासा वाटतो. अनेकजण त्याच्यावर जीवापाड प्रेम करतात. त्यामुळेच लोक लक्ष्मीकांत यांचा एकेरी उल्लेख करतात. लक्ष्मीकांत यांनी कमी वयात जगाचा निरोप घेतला. पण चाहत्यांच्या मनात ते आजही घर करुन आहेत.
लक्ष्मीकांत बेर्डे यांचे ‘झपाटलेला’, ‘धुमधडाका’, ‘अशी ही बनवाबनवी’, ‘थरथराट’, ‘अफलातून’ असे कित्येक चित्रपट आजही तितक्याच आवडीनं पाहिले जातात आणि त्यामुळे लक्ष्मीकांत यांची लोकप्रियता आजही कायम आहे. आज लक्ष्मीकांत यांचा जन्मदिवस आहे. लक्ष्मीकांत यांच्या जन्मदिवसानिमित्त त्यांच्या पत्नी प्रिया बेर्डे यांनी सोशल मीडियावरुन भावुक पोस्ट केली आहे. लक्ष्मीकांत यांचा फोटो शेअर करत खूप सुंदर असं कॅप्शन देत त्यांनी ही पोस्ट शेअर केली आहे.
आणखी वाचा – माधुरी दीक्षितसह स्टेजवर परफॉर्म करताना विद्या बालन खाली पडली अन्…; पुढे काय झाले ते पाहून व्हाल थक्क
प्रिया बेर्डे यांनी पोस्ट शेअर करत म्हटलं की, “७० वर्ष. आज जन्मदिवस. अजूनही तुमचं गारुड लोकांच्या मनावर आहे, एक अभिनेता, चांगला माणूस म्हणून आज ही लोक तुमच्या बद्दल तेवढ्याच उत्साहाने बोलतात. विनोद अनेक रुपाने समोर आला कधी दादागिरीने तर कधी विनोदाचा सम्राट, तर कधी भोळा भाबडा राजा म्हणून पण या महारथींच्या मांदियाळीत या कार्ट्याने स्वतःची शैली, स्वतःच वेगळेपण सिद्ध केलं. त्यांना कुठलीच पदवी दिली गेली नाही तो कायम सगळ्यांसाठी लक्ष्याच राहिला आणि राहणारही फक्त ‘लक्ष्या'”, असं म्हटलं आहे.
आणखी वाचा – Video : “तर आईच्या पुढ्यात डोकं ठेवा…”, संकर्षण कऱ्हाडेने आईबाबत सादर केली कविता, उपस्थितही रडू लागले अन्…
लक्ष्मीकांत बेर्डे व प्रिया बेर्डे यांची दोन्ही मुलंही सिनेविश्वात कार्यरत आहेत. अभिनय बेर्डे व स्वानंदी बेर्डे अशी त्यांची नाव आहेत. तर प्रिया बेर्डे गेली अनेक वर्ष चित्रपट, मालिका, नाटकांमधून नेहमीच प्रेक्षकांचे मनोरंजन करत आहेत. केवळ मराठीच नव्हे तर हिंदी चित्रपटांमध्येही प्रिया बेर्डे झळकल्या आहेत. त्यांनी साकारलेल्या विविध व्यक्तिरेखांना प्रेक्षकांनी भरभरुन प्रेम दिलं आहे. अभिनयाबरोबर प्रिया बेर्डे राजकारणात सक्रिय असून त्या कलाकार व तंत्रज्ञ यांचे विविध प्रश्न मार्गी लावण्यासाठी त्या अनेक प्रयत्न करतात.
