छोट्या पडद्यावरील ‘जुळून येती रेशीमगाठी’ मालिकेद्वारे रेशीमगाठ जुळवत प्रेक्षकांच्या मनावर राज्य करणारी अभिनेत्री म्हणजे प्राजक्ता माळी. प्राजक्ताने आजवर मराठी मालिका, चित्रपट यांसह अनेक कार्यक्रमांद्वारे सूत्रसंचालन करत प्रेक्षकांचे मनोरंजन केले आहे. आपल्या अभिनय व उत्तम सूत्रसंचालनाद्वारे चर्चेत असणारी अभिनेत्री तिच्या सोशल मीडियाद्वारे ही तितकीच चर्चेत राहत असते. सोशल मीडियाद्वारे प्राजक्ता नेहमीच तिचे हटके व स्टायलिश फोटो शेअर करत असते.
अशातच तिने काल (०९ मे) शेअर केलेल्या फोटोमुळे अभिनेत्री चांगलीच चर्चेत आली. या फोटोमध्ये प्राजक्ता तिच्या आईसह काही कागदपत्रांवर सही कारतानाचे पाहायला मिळाले होते. प्राजक्ताने ही पोस्ट शेअर करत “२३ एप्रिल २०२४ रोजी सर्वात आवडत्या, बहुप्रतिक्षित कागदपत्रांवर सही केली. ही विवाह नोंदणी अजिबात नाही. या क्षणी माझे हृदय कृतज्ञतेने भरले आहे”. असं म्हटलं होतं. अशातच आता अभिनेत्रीने तिच्या निर्मिती क्षेत्रातील पदार्पणाची घोषणा केली आहे. नुकतंच तिने तिच्या सोशल मिडियावर तिच्या आगामी चित्रपटाचा व्हिडीओ शेअर करत तिच्या भावना व्यक्त केल्या आहेत.
आणखी वाचा – ‘अक्षय्य तृतीया’ म्हणजे नेमकं काय?, ‘या’ दिवसाचं महत्त्व आहे खूपच खास, जाणून घ्या…
या व्हिडीओखाली प्राजक्ताने असं म्हटलं आहे की, “’पॅनोरामा’चा पहिला बिग-बजेट ऐतिहासिक मराठी आणि ‘शिवोहम’ची पहिली निर्मिती असलेला चित्रपट ‘फुलवंती’ आपल्या भेटीला येत आहे. कोणतीही पहिली गोष्ट ही नेहमीच खास असते. या क्षणी कृतज्ञता व्यक्त करण्यासाठी शब्द नाहीत. ‘पेशवे युग, नृत्य आणि संगीत’ची जादू तुमच्यापर्यंत आणण्यासाठी आणखी वाट बघू शकत नाही. तुमचा आशीर्वाद आणि प्रेम असेच कायम राहूद्या.”
आणखी वाचा – “मावशी ऑन ड्युटी…”, लाडक्या भाचीबरोबर वेळ घालवत आहे जुई गडकरी, बालपणीच्या आठवणीतही रमली अन्…; म्हणाली…
प्राजक्ताच्या या घोषणेनंतर मराठी कलाविश्वातून अनेक कलाकार मंडळींनी तिच्यावर शुभेच्छांचा वर्षाव केला आहे. अमृता खानविलकर, ऋतुजा बागवे, आरोह वेलणकर, अश्विनी कासार यांसारख्या कलाकारांनी तिला कमेंट्सद्वारे शुभेच्छा दिल्या आहेत. तसेच प्राजक्ताच्या अनेक चाहत्यांनीही अभिनेत्रीचे निर्मिती क्षेत्रातील पदार्पणानिमित्त कौतुक केले असून तिला शुभेच्छाही दिल्या आहेत.
