Prajakta Gaikwad Engagement Look : ‘स्वराज्यरक्षक संभाजी’ या मालिकेतून घराघरांत लोकप्रिय झालेली अभिनेत्री प्राजक्ता गायकवाडने काही दिवसांपूर्वीच लग्न ठरल्याचं जाहीर केलं होतं. सोशल मीडियावर “ठरलं! कुंकवाचा कार्यक्रम” अशी पोस्ट शेअर करत अभिनेत्रीने तिच्या सगळ्या चाहत्यांना गूडन्यूज दिली होती. त्यानंतर अभिनेत्रीच्या घरी तिच्या साखरपुड्याची तयारी सुरू असल्याचं पाहायला मिळालं. तेव्हापासून अभिनेत्री केव्हा लग्न करणार, तिचा होणारा जोडीदार कोण आहे याबाबत चर्चा रंगून राहिली होते. अखेर अभिनेत्रीने साखरपुडा समारंभ उरकत तिच्या होणाऱ्या नवऱ्याची झलक सोशल मीडियाद्वारे दाखवली आहे.
प्राजक्ताने अगदी शाही थाटामाटात साखरपुडा समारंभ केला. अभिनेत्रीच्या या शाही सोहळ्याने अनेकांचे डोळे सुखावले. प्राजक्ताच्या या आनंदाच्या बातमीनंतर चाहते तिच्यावर शुभेच्छांचा वर्षाव करताना दिसत आहेत. अगदी नाचत गाजत प्राजक्ताची एंट्री या साखरपुडा असलेल्या मंडपात झालेलीही पाहायला मिळाली. अभिनेत्रीच्या पारंपरिक अंदाजात साखरपुड्याचे विधी उरकले तर वेस्टर्न आऊटफिट परिधान करत त्यांनी एकमेकांना अंगठी घातली.
आणखी वाचा – प्राजक्ता गायकवाडचा साखरपुडा संपन्न, नवऱ्याचा फोटोही समोर, नावाच्या बाबतीत जुळून आला योगायोग
प्राजक्ताच्या साखरपुड्याची लक्षवेधी बाब म्हणजे त्यांचा रॉयल लूक. साखरपुड्यासाठी प्राजक्ताने ऑफ व्हाईट रंगाची डिझाइनर साडी नेसली होती आणि त्यावर लाल रंगाचा ब्लाऊज परिधान केला होता. त्या ब्लाऊजवर असलेल्या सुंदर अशा नक्षीकामाने साऱ्यांचं लक्ष वेधून घेतलं. प्राजक्ताच्या ब्लाउजच्या मागे ‘शंभूराज’ असं नाव लिहिलेलं पाहायला मिळालं. तर तिचा होणारा जोडीदार पांढऱ्या रंगाच्या जोधपुरी सूटमध्ये असून त्याच्या कोटवर ‘प्राजक्ता’ असं लिहिलं होतं. त्यांच्या या वेषभूषेतून परस्परांवरील प्रेम स्पष्टपणे व्यक्त होत आहे.
‘स्वराज्यरक्षक संभाजी’, ‘नांदा सौख्य भरे’, ‘संत तुकाराम’, ‘आई माझी काळुबाई’ यांसारख्या लोकप्रिय मालिकांमधून प्राजक्तानं आपली वेगळी ओळख निर्माण केली. अभिनय क्षेत्रात ती नेहमीच चमकदार कामगिरी करत आली आहे. आता ती वैयक्तिक आयुष्यातही एका नव्या पर्वाला सुरुवात करत आहे. ‘स्वराज्यरक्षक संभाजी’ या मालिकेत तिने छत्रपती संभाजी महाराजांच्या पत्नीची म्हणजेच महाराणी येसू बाईंची भूमिका केली होती. आता प्राजक्ताच्या नवऱ्याच्या बाबत सुद्धा एक खास योगायोग जुळून आला आहे. प्राजक्ताच्या होणाऱ्या पतीचं नावही ‘शंभूराज’ असं आहे.
