प्रेक्षकांच्या लाडक्या किंग खानचा यावर्षी ५८वा वाढदिवस आहे. शाहरुख खानच्या वाढदिवसानिमित्त त्याच्यावर जगभरातून शुभेच्छांचा वर्षाव होत आहे. शाहरुखने आजवर जगभरात प्रचंड चाहते कमावले आहेत आणि याची प्रचिती दरवर्षी त्याच्या वाढदिवसाला येते. २ नोव्हेंबरला रात्री १२ वाजण्याच्या सुमारास किंग खानचे हजारो चाहते त्याला वाढदिवसाच्या शुभेच्छा देण्यासाठी त्याच्या घराजवळ जमतात. त्याच्या घराबाहेर आतषबाजी ही करण्यात येते, तसेच अनेक चाहते किंग खानच्या दीर्घायुष्यासाठी प्रार्थनाही करतात. या चाहत्यांमध्ये कलाकार मंडळीही मागे नाहीत. (Mukta Barve On Shahrukh Khan)
किंग खानचे बरेच कलाकार मंडळीही चाहते आहेत. अशातच शाहरुख खानच्या वाढदिवसानिमित्त मुक्ता बर्वेने तिच्या इंस्टाग्राम अकाऊंटवरून त्यांचा एक जुना व्हिडीओ शेअर केला आहे. या व्हिडिओमध्ये मुक्ता शाहरुखसह दिसतेय. या व्हिडिओमध्ये शाहरूख तिचा हात पकडून तिला स्टेजवर घेऊन येताना दिसतोय आणि तिला गालावरही किस करताना दिसत आहे. शाहरुख खान म्हणजे रोमान्सचा बादशाह अशी त्याची ओळख आहे. असं असलं तरी प्रत्येक स्त्रीबद्दल त्याला विशेष आदर आहे.
पडद्यावरच नाही तर खऱ्या आयुष्यातही आजवर त्याने प्रत्येक स्त्रीकडे आदरयुक्त भावनेने पाहिलं आहे. मुक्ता बर्वेच्या इंस्टाग्राम अकाऊंटवरून ‘हृदयांतर’ चित्रपटाच्या प्रमोशनवेळेचा एक व्हिडिओ शेअर करण्यात आला आहे. विक्रम फडणीस यांच्या या सिनेमाच्या प्रमोशनमध्ये शाहरुखही सहभागी झाला होता. दरम्यान शाहरुख हातात क्लॅपबोर्ड घेऊन माध्यमांना पोज देताना दिसला. तसेच शाहरुख खान मुक्ताचा हात धरुन तिला स्टेजवर घेऊन जाताना दिसला. स्टेजवर येताच शाहरुखने मुक्ताच्या गालावर किसही केलेली दिसतेय. मुक्तासाठी शाहरुखबरोबरची तिची ही भेट नक्कीच अविस्मरणीय असेल यांत वादच नाही. तिचा हा व्हिडिओ सध्या सोशल मीडियावर व्हायरल होतोय.
आज शाहरुखच्या वाढदिवसाची सोशल मीडियावर चांगलीच क्रेझ पाहायला मिळतेय. त्याचा वाढदिवस आणि त्याचा आगामी चित्रपट ‘डंकी’चा टिझरही सोशल मीडियावर धुमाकूळ घालतोय. येत्या २२ डिसेंबरला ‘डंकी’ हा चित्रपट संपूर्ण देशभरात प्रदर्शित होणार आहे.