‘फॅशन’मध्ये प्रियांका चोप्रा आणि कंगना रणौतच्या भूमिकेचं जेवढं कौतुक झालं तेवढंच कौतुक जॅनेटची भूमिका साकारणाऱ्या अभिनेत्रींचही झालं. बिनधास्त अंदाजात सोशल मीडियावर खळबळ उडवणाऱ्या या अभिनेत्रीने ‘फॅशन’द्वारे चित्रपटात पदार्पण केलं. ती अभिनेत्री दुसरी तिसरी कुणी नसून मराठमोळी मुग्धा गोडसे होय. आपल्या अभिनयाने चर्चेत राहणारी ही अभिनेत्री सोशल मीडियावरही तितकीच सक्रिय असते.
सोशल मीडियावर आपले अनेक फोटो व व्हिडीओ शेअर करत ती चाहत्यांच्या संपर्कात राहत असते. अभिनयासह वैयक्तिक आय़ुष्यातल्या गोष्टीही ती चाहत्यांबरोबर शेअर करत असते. अशातच अभिनेत्रीने तिच्या आईला एका ठिकाणी आलेल्या वाईट अनुभवाविषयीची पोस्ट शेअर केली आहे. या पोस्टद्वारे मुग्धाने आपलं म्हणणं परखडपणे मांडलं असून तिने तिच्या अधिकृत एक्स (पूर्वीचे ट्विटर) पोस्टद्वारे संतापही व्यक्त केला आहे.
WRONGED at all levels … @Chaayos @Salujanitin
— Mugdha Veira Godse (@mugdhagodse267) May 9, 2024
Pls take a hard look at your Human Resource employed at the #Chaayos Inorbit Mall Store at Malad W, Mumbai.
Yesterday my mother 'n I had ordered tea to wind down after some heavy shopping.
I had left her alone for 5 mins to get… pic.twitter.com/ncPSf1CT27
या पोस्टमध्ये मुग्धाने असं म्हटलं आहे की, “हे खूप चुकीचं आहे. कृपया मालाड पश्चिम, मुंबई येथील इनॉर्बिट मॉलमध्ये असलेल्या नामांकित रेस्टॉरंटमध्ये कार्यरत असलेल्या तुमच्या कर्मचाऱ्यांकडे लक्ष द्या. काल (८ मे) माझ्या आईने आणि मी खरेदी केल्यानंतर ‘चायोस’मधून चहा घेतला. त्यानंतर बाजूच्या दुकानातून काहीतरी सामान आणण्यासाठी मी तिला तेथे पाच मिनिटांसाठी एकटीला सोडून गेले होते. परत येताच मी पाहिलं की, ती दुकानाबाहेर जड शॉपिंग बॅग हातात घेऊन असहाय्यपणे उभी होती. तिला असं पाहून मला धक्काच बसला.”
यापुढे तिने या पोस्टमध्ये असं म्हटलं आहे की, “याबद्दल मी माझ्या आईला विचारले असता तिने सांगितले की, तिथल्या कर्मचाऱ्यांनी तिला तिथून जाण्यास सांगितलं. कारण सहा-सात लोकांना तिच्या जागेवर बसायचं होतं. मग मी तिथल्या मॅनेजर दृष्टी यांना याबाबत सांगितलं. पण त्यांनी त्यांची चूक कबूल केली नाही.” यापुढे मुग्धाने “ज्या देशात आपण वृद्ध माणसांचा आदर करतो, तिथे अशी वागणूक मिळणं हा न्याय आहे का?” असा प्रश्न उपस्थित करत “माझी यामुळे खूप घोर निराशा झाली आहे.” असं ही म्हटलं आहे.