chinmayee Sumeet car accident : महाराष्ट्रात पहिली इयत्तेपासून हिंदी भाषा अभ्यासक्रमात यावी या राज्य सरकारच्या निर्णयावरुन वाद सुरु झाला. सरकारने हिंदी शिकवणे अनिवार्य म्हटलं आणि हा वाद पेटून उठला. दरम्यान, जनतेने केलेल्या विरोधानंतर हा अनिवार्य शब्द हटविण्यात आला. अनेक स्तरातून हिंदी भाषा नको याबद्दल प्रतिक्रिया व्यक्त केली जात आहे. अनेकांनी या निर्णयाला ठाम विरोध केला आहे. हिंदी सक्तीबद्दल मराठी कलाक्षेत्रातूनही अनेक कलाकार मंडळी त्यांच्या प्रतिक्रिया व्यक्त करताना दिसत आहेत. हिंदी भाषेच्या सक्तीवर अनेक कलाकारांनी स्पष्ट भूमिका व्यक्त केल्या आहेत.
या प्रकरणावरुन पहिल्यांदाच मनसे आणि ठाकरेगट एकत्र येत आंदोलन करत आहेत. काँग्रेसचाही या आंदोलनाला पाठिंबा आहे. या आंदोलनात राज्यातील नागरिकांसह अनेक सेलिब्रिटी मंडळीही सहभागी झाले आहेत. अशातच अभिनेत्री चिन्मयी सुमितने व्हिडीओ शेअर करत या आंदोलनाला पाठिंबा दिला असून यावेळी तिला उपस्थित राहता येणार नसल्याचं स्पष्ट केलं आहे. महाराष्ट्र टाइम्सच्या वृत्तानुसार चिन्मयी यांनी इंस्टाग्राम अकाउंटवर व्हिडीओ शेअर केला होता, मात्र हा व्हिडीओ आता त्यांच्या फीडवररुन काढण्यात आला आहे. या व्हिडीओद्वारे त्यांनी त्यांचा अपघात झाला असल्याचं सांगितलं.
आणखी वाचा – तीन मजली बंगला, स्विमिंगपूल आणि…; फराह खानचा कुक दिलीपचं गावी आहे टोलेजंग घर, पाहताच बसेल धक्का
चिन्मयी यांनी व्हिडीओ शेअर करत अपघाताची बातमी दिली आणि याचबरोबर या आंदोलनात सहभागी होऊ शकत नसल्याची खंतही व्यक्त केली आहे. त्या म्हणाल्या, “नमस्कार मी चिन्मयी सुमीत, आज २९ जून. आपण गेले काही दिवस तिसरी भाषा हिंदी सक्ती विरोधात आंदोलन करत आहोत. गेले अडीच महिने आम्ही रान पेटवलंय आणि त्याला खूप चांगला प्रतिसाद मिळत आहे. आज आंदोलनाचा पहिला टप्पा कृतिशील हस्तक्षेपाचा जिथे आपण ही अन्यायकारक परिपत्रक आणि आदेशांची होळी करणार आहोत. पत्रकार भवन गिरगाव येथे हा कार्यक्रम आयोजित केलेला आहे. दोन दिवसांपूर्वी माझा एक अपघात घडला, त्यामुळे तिथे उपस्थित राहण्यासाठी डॉक्टरांनी मला परवानगी दिलेली नाही”.
पुढे त्यांनी म्हटलं की, “मी तिथे जरी शरीराने नसली तरी तमाम मराठीजनांना मी आवाहन करते की या आंदोलनात आपली संख्या अत्यंत मोठ्या प्रमाणात दिसू द्या. पहिल्यांदा असं होतंय जेव्हा राजकीय पक्ष आणि नागरीक समजा कोणत्या तरी एका विषयावर एकत्र येऊन आदोलन उभं करत आहेत. त्या सर्व राजकीय पक्षांना माझे मनापासून धन्यवाद. मी आज तिथे उपस्थित राहू शकत नाही याबद्दल मला खूप मोठी खंत वाटते, पण मला विश्वास आहे की तुम्ही सर्व मोठ्या संख्येने तिथे उपस्थित राहाल आणि ते आंदोलन कराल. आपण एकत्र आलो आहोत. एकत्र संघर्ष करुयात, विजयी होऊया. जय भीम, जय हिंद आणि जय महाराष्ट्र. जय मराठा”.
