हिंदी मराठी सिनेसृष्टीत आपल्या उत्तम अभिनयाने व सोज्वळ लूकने मराठमोळी अभिनेत्री सीमा देव यांनी प्रेक्षकांच्या मनात कायमच घर केलं. वयाच्या ८१ व्या वर्षी त्यांनी जगाचा निरोप घेतला. त्यांच्या निधनाच्या बातमीने सिनेसृष्टीवर शोककळा पसरली आहे. सिनेमाविश्वातील अनेक कलाकार मंडळी हळहळ व्यक्त करत आहेत. (Ashvini Bhave On Seema Deo Death)
अनेक कलाकार मंडळी सोशल मीडियावरून पोस्ट शेअर करत सीमा देव यांच्या आठवणींना उजाळा देत आहेत. तर बऱ्याच कलाकारांनी सीमा देव यांना श्रद्धांजली वाहिली आहे. अशातच सीमा देव यांच्या निधनांनंतर अभिनेत्री अश्विनी भावे यांनी एक पोस्ट शेअर केली आहे. या पोस्टमध्ये त्यांनी सीमा देव यांचा एक फोटो शेअर केला आहे. त्याबरोबरच त्यांनी त्यांच्या अभिनयाबद्दलही भाष्य केले आहे. आणि त्यांना श्रद्धांजली वाहिली आहे.
अश्विनी भावे यांनी पोस्ट शेअर करत म्हटलं आहे की, “सीमा ताईंच्या निधनाची बातमी ऐकुन खूप दुःख होत आहे. सीमाताईंचे पडद्यावरचे लोभस रूप आणि त्यांच्या तरल अभिनयाने मी लहान वयातच खूप प्रेरित झाले होते. व्यवसाय आणि कौटुंबिक जबादारी यांचा योग्य समन्वय साधून त्यांनी स्त्री कलाकारांना एक प्रतिष्ठा प्राप्त करून दिली आणि अजरामर भूमिकांनी लोकांच्या मनावर राज्य केलं. स्त्रीच्या आयुष्यातल्या सर्वच भूमिका त्यांनी समर्थपणे पेलल्या. रमेश काकांवर आणि मुला-नातवंडांवर अपार प्रेम केलं”.
“सीमा ताई खऱ्या अर्थाने एक परिपूर्ण आयुष्य जगल्या. अजिंक्य, अभिनय आणि कुटुंबीयांना हे अपार दुःख सहन करण्याची ताकद लाभो आणि मृतात्म्यास शांती लाभो अशी मी ईश्वरा कडे प्रार्थना करते. ओम शांती” !
‘जगाच्या पाठीवर’, ‘मोलकरीण’, ‘यंदा कर्तव्य आहे’, ‘या सुखांनो या’, ‘सुवासिनी’, ‘हा माझा मार्ग एकला’ यांसारख्या अनेक चित्रपटांमधून सीमा देव यांनी उत्तम काम केले. ‘आनंद’ या अत्यंत गाजलेल्या हिंदी चित्रपटातील त्यांची भूमिका आजही कायम लक्षात राहते.