rutwik talwalkar engagement : मराठी कलाविश्वात अनेक कलाकार मंडळी आहेत जे चाहत्यांसह आनंदाची बातमी शेअर करतात. काही कलाकार त्यांच्या नव्या घराची आनंदाची बातमी देतात, तर काही कलाकार लग्नाची, साखरपुड्याची, आई-बाबा झाल्याची आनंदाची बातमी देतात. अशातच आता मराठी मालिकाविश्वातील एका अभिनेत्याचा साखरपुडा झाला असल्याची गुडन्यूज समोर आली आहे. अभिनेत्याच्या साखरपुड्याचे अनेक फोटो सोशल मीडियावर व्हायरल होत आहेत. हा मराठी अभिनेता म्हणजे ‘लक्ष्मीच्या पाऊलांनी’ फेम अभिनेता ऋत्विक तळवलकर. स्टार प्रवाह वाहिनीवर ‘लक्ष्मीच्या पाऊलांनी’ मालिका सुरु असून या मालिकेतील ऋत्विकचा साखरपुडा समारंभ पार पडला आहे.
‘लक्ष्मीच्या पाऊलांनी’ या मालिकेला प्रेक्षकवर्ग भरभरुन प्रतिसाद देत आहे. मालिकेतील सगळीच पात्र रसिकांच्या मनावर अधिराज्य गाजवत आहेत. काही दिवसांपूर्वी या मालिकेतील मुख्य अभिनेता अक्षर कोठारी म्हणजेच मालिकेतील अद्वैत चांदेकरने खऱ्या आयुष्यात लग्नगाठ बांधली. या पाठोपाठ मालिकेत अद्वैतच्या लहान भावाची भूमिका साकारणाऱ्या सोहमनेही त्याच्या आयुष्यात एक नवं पाऊल टाकलं आहे. सोहम म्हणजेच अभिनेता ऋत्विक तळवलकरचा साखरपुडा झाला आहे.
आणखी वाचा – जेजुरीत खंडोबाच राहायला येणार! ‘जय मल्हार’ फेम अभिनेत्याच जेजुरीत होणार हक्काचं घर, भूमिपुजनाचे फोटो समोर
काही दिवसांपूर्वीच ऋत्विकने सोशल मीडियाद्वारे पोस्ट शेअर करत प्रेमाची जाहीर कबुली दिली. ऋत्विकच्या गर्लफ्रेंडच नाव अनुष्का चंदक असे आहे. पोस्ट शेअर करत अभिनेत्याने चार वर्षांपासून तो रिलेशनशिप मध्ये असल्याची माहिती दिली. यानंतर आता अभिनेत्याचा साखरपुडा झाल्याचं समोर आलं आहे. साखरपुड्यासाठी ऋत्विकने काळ्या रंगाचा ब्लेझर सूट परिधान केला आहे. तर अनुष्काने शुभ्र पांढऱ्या रंगाची वेस्टर्न साडी नेसली आहे.
“४ वर्षांचं रिलेशनशिप, ३ वर्षे लॉन्ग डिस्टेंस रिलेशनशिप… या दिवसाची मी खूप आतुरतेने वाट पाहिली आहे”, असं म्हणत ऋत्विकने प्रेमाची कबुली दिली. या दोघांच्या साखरपुड्याचे फोटो आता सोशल मीडियावर व्हायरल होत आहेत. मराठी कलाविश्वातून ऋत्विकवर शुभेच्छांचा वर्षाव होताना पाहायला मिळत आहे. आता ऋत्विक व अनुष्का खऱ्या आयुष्यात केव्हा लग्नबंधनात अडकणार याकडे साऱ्यांच्या नजरा लागून राहिल्या आहेत.
