अभिनेत्री क्रांती रेडकरने आजवर अनेक चित्रपट, मालिका यांमधून महत्त्वपूर्ण भूमिका साकारत प्रेक्षकांची मनं जिंकली. क्रांती नेहमीच तिच्या सोशल मीडियावरील वावरामुळे चर्चेत असते. सोशल मीडिया हे सध्या मनोरंजनाचे साधन आहे. सोशल मीडियाद्वारे अनेकजण वेगळ्या प्रकारचा कंटेट तयार करतात आणि चाहत्यांसह शेअर करतात. अशातच क्रांती नेहमीच सोशल मीडियावर काही ना काही कंटेंट शेअर करताना दिसते. विविध, हटके रील व्हिडीओ ती नेहमीच शेअर करताना दिसते. (Kranti Redkar Answers To Netizens)
बरेचदा या रील व्हिडीओमुळे क्रांतीला ट्रोलही करण्यात आलं आहे. अनेकदा क्रांतीने या ट्रोलिंगकडे दुर्लक्ष केलं आहे तर काहीवेळा या ट्रोलिंगवर भाष्य करत सडेतोड उत्तरही दिलं आहे. लग्नानंतर क्रांती तिच्या सांसारात अधिक रमलेली दिसली. त्यानंतर तिने जुळ्या मुलींना जन्म दिला. मुली झाल्यानंतर क्रांतीने सिनेविश्वातून काहीसा ब्रेक घेतलेला पाहायला मिळाला. क्रांती फारशी सिनेसृष्टीत दिसली नाही यावरुन तिला नेटकऱ्याने प्रश्न विचारला आहे.
आणखी वाचा – मुंबईतील महागड्या ठिकाणी आमिर खानने खरेदी केलं नवं घर, एकूण किंमत आहे तब्बल…
“तुम्हाला चित्रपट ‘भेटत’ नाही का?” असा प्रश्न नेटकऱ्याने क्रांतीच्या पोस्टखाली विचारला. माणसं भेटतात आणि वस्तू मिळतात ही गोष्ट साऱ्यांना ज्ञात आहे. असे असूनही नेटकऱ्याने प्रश्न विचारताच क्रांतीने व्याकरणाची चूक केली आहे. यावर क्रांतीने नेटकऱ्यांच्या प्रश्नांवर उत्तर देण्याआधी व्याकरणाची चूक सुधारत उत्तर दिलं आहे.
“चित्रपट ‘भेटत नाही’, ‘मिळतो’ आणि तुम्ही विचारलेल्या प्रश्नाचं उत्तर आहे. मला कधी कधी चित्रपट मिळत नाहीत आणि कधी कधी मिळतात. पण, सध्या माझ्या दोन्ही मुली लहान आहेत. त्यामुळे अनेकदा माझ्या शूटिंगच्या तारखा जुळत नाहीत. आता येत्या काळात मी काही चित्रपट करत आहे. ते लवकरच प्रदर्शित होतील”, असं उत्तर तिने नेटकऱ्याच्या प्रश्नावर दिलं आहे.
