मराठी सिनेसृष्टीतील ग्लॅमरस व आघाडीच्या अभिनेत्रींच्या यादीत एका अभिनेत्रीचं नाव आवर्जून घेतलं जातं ते म्हणजे अभिनेत्री सई ताम्हणकर. मराठीसह सईने बॉलिवूडमध्येही महत्त्वपूर्ण कामगिरी करत स्वतःच असं स्थान निर्माण केलं. रुपेरी पडद्यावर ती साकारत असलेल्या भूमिकांचं विशेष कौतुकही होताना दिसतं. अभिनेत्री सोशल मीडियावरही बऱ्यापैकी चर्चेत असलेली पाहायला मिळाली आहे. हटके व ग्लॅमरस फोटोशूटमुळे सई नेहमीच चर्चेत असते. तसेच सईचे खासगी आयुष्यही कोणापासून लपून राहिलेले नाही. (Sai Tamhankar On Her Wedding Dress)
सईच्या लग्न, अफेअर यांबाबतच्या अनेक बातम्या बरेचदा कानावर पडतात. स्वबळावर, स्वमहेनतीवर आणि कोणीही वारसा हक्क नसताना सईने सिनेसृष्टीत स्वतःच स्थान निर्माण केलं. व्यावसायिक आयुष्यात सईने बरीच प्रगती केली असली तरी तिचं खासगी आयुष्य तितकंसं चांगलं राहील नाही. असं असलं तरी सईने स्वकमाईवर तिचं मुंबईत आलिशान घर घेतलं आहे. सईच्या या आलिशान घराची सफर आपल्याला तिच्या युट्युब चॅनेलवरुन पाहायला मिळाली. दरम्यान, ‘Hauterrfly’ या युट्युब चॅनेलला सईने मुलाखत दिली. यावेळी तिने तिच्या कपाटातील खास कपड्यांबद्दलच्या आठवणी शेअर केल्या.
समोर आलेल्या या व्हिडीओमध्ये असं पाहायला मिळत आहे की, सईनं तिच्या वार्डरॉबमधून एक खास ड्रेस काढला. तो ड्रेस दाखवत ती म्हणाली, “ही माझी लग्नाची साडी होती, ती मला टाकून द्यायची नव्हती,त्यामुळे मी हा चुडीदार ड्रेस शिवून घेतला आहे. भारतातील मोठा डिझायनर सब्यसाची याने ही साडी डिझाइन केलेली आहे”, असंही ती म्हणाली. पुढे ती म्हणाली, “अशा नाजूक साड्या कपाटात ठेवून ठेवून आणि मुंबईच्या दमट वातावरणात नंतर खराब होतात. पण हा ड्रेस मी कितीही वेळा रिपीट करु शकते. अर्थात हा ड्रेस माझ्यासाठी खूप जास्त स्पेशल आहे”, असं ती म्हणाली.
अमेय गोसावी या व्यक्तीशी सईचं लग्न झालं होतं. मात्र तिचं हे लग्न फार काळ टिकलं नाही. सईच्या पहिल्या लग्नाबद्दल बोलायचे झाले तर, अमेयला तीन वर्षे डेट केल्यानंतर सईनं लग्न करण्याचा निर्णय घेतला आणि ७ एप्रिल २०१२ रोजी त्यांनी साखरपुडा केला. त्यानंतर १५ डिसेंबर २०१३ रोजी सई व अमेयने लग्न केलं होतं. मात्र त्यांनतर त्यांनी काही वर्षातच घटस्फोट घेतला. असं असलं तरी सई व अमेय चांगले मित्र आहेत असं सई अनेकदा मुलाखतींमध्ये बोलली आहे.
