अभिनेते किरण माने (Kiran Mane) यांच्याबाबत एक दुःखद बातमी समोर आली आहे. किरण यांना पितृशोक झाला आहे. ३० मार्च रोजी किरण यांच्या वडिलांचे निधन झाले. ते ८६ वर्षांचे होते. वडिलांच्या निधनाबाबत किरण यांनी इंस्टाग्राम पोस्ट शेअर करत माहिती दिली होती. त्यानंतर आता किरण यांनी वडिलांच्या आठवणीत इंस्टाग्रामवर भावुक पोस्ट शेअर केली आहे. यावेळी त्यांनी वडिलांबरोबरचे फोटोही शेअर केले आहेत. किरण यांची ही पोस्ट पाहून त्यांच्या चाहत्यांनी त्यांच्या वडिलांना श्रद्धांजली वाहिली आहे. तर काहींनी अभिनेत्याला दुःखातून सावरण्यासाठी कमेंट करत धीरही दिला आहे. (kiran mane shares emotional post)
किरण माने यांची वडिलांच्या आठवणीत भावुक पोस्ट
किरण यांनी वडिलांचे फोटो शेअर करत भावुक कॅप्शन देत असं म्हटलं की, “माझ्या मांडीवर शांतपणे दादांनी जीव सोडला. माझी खूप धावपळ सुरु होती. कोल्हापूरला इंद्रजीत सावंतांचा सत्कार झाला. नंतर चंद्रपूरला आंबेडकरी अस्मिता परिषदेसाठी गेलो. तिथून नागपूरला येऊन रात्री बाराच्या फ्लाईटने पुणे एअरपोर्टवर उतरलो. दुसर्‍या दिवशीपासून नाशिकला शुटिंग सुरु होणार होतं. एक दिवसासाठी कशाला साताऱ्याला जायचं?, शुटिंग संपल्यावर जाऊ साताऱ्याला या विचारानं मी नाशिकला निघालोच होतो. पण बायकोच्या आग्रहाखातर अचानक निर्णय बदलला. गुढी पाडव्याच्या दिवशी साताऱ्याला घरी तीन-चार तास थांबून मग नाशिकला जाऊ असं ठरवलं आणि साताऱ्याला आलो”.
आणखी वाचा – ऑनलाईन ६१ लाखांची फसवणूक झाली तो सागर कारंडे नव्हेच, खोट्या आरोपांवर म्हणाला, “हा संपूर्ण प्रकार…”
“दादांच्या जवळ जाऊन बसलो. ते खुर्चीत शांत बसले होते. म्हटलं, दादा मी नाशिकला चाललोय आजच लगेच. काही बोलले नाहीत. फक्त हातानं खुणावलं की, शेजारी बस. मी बसलो पण दादा काहीच बोलेनात. मला वाटलं त्यांना झोप आली आहे. त्यांना बेडवर झोपवण्यासाठी मी आणि बायकोनं दोन्ही बाजूनं उचललं तर पायातला जीव गेल्यासारखे अलगद खाली बसले. माझ्या मांडीवर डोकं ठेवलं आणि शेवटचा श्वास घेतला. ज्या शांतसरळ मार्गानं जगले, तसेच शांतपणे गेले”.
“दादा, तुम्ही माझ्याकडून अपेक्षा ठेवल्या असतील तर फक्त याच ठेवल्या की, चांगला माणूस हो, पैसा कमव पण चुकीच्या मार्गाने कमावू नकोस, प्रामाणिकपणा सोडू नकोस, सत्य बोलायला घाबरु नकोस आणि गोरगरिबांना यथाशक्ती मदत कर. दादा, काल तुमचे जुने मित्र आले होते. ते म्हणाले, ‘तुझ्या वडीलांकडे सुखी माणसाचा सदरा होता’. तो सदरा याच गुणांमुळे तुम्ही कमावला होतात दादा. आणि तोच तुम्ही वारशात ठेवला आहे. जगी ऐसा बाप व्हावा| ज्याचा वंश मुक्तीस जावा||”.
किरण माने यांच्या वडिलांनी सातारा येथील त्यांच्या राहत्या घरी अखेरचा श्वास घेतला. त्यांचे संपूर्ण नाव दिनकरराव मारुती माने असे आहे. वृद्धापकाळाने त्यांचे वयाच्या ८६ व्या वर्षी निधन झाले. वडिलांच्या निधनाने किरण यांच्यासह त्यांच्या कुटुंबावरही दुःखाचा डोंगर कोसळला आहे.
