छोट्या पडद्यावरील ‘महाराष्ट्राची हास्यजत्रा’ या शोमधून अनेक कलाकार प्रसिद्धीझोतात आले. या शोने प्रत्येक कलाकाराला एक वेगळी ओळख निर्माण करून दिली. अशा अनेक कलाकारांपैकी एक कलाकार म्हणजे अभिनेता श्याम राजपूत. ‘खानदेशचा सपूत श्याम राजपूत’ अशी आपली एक वेगळी ओळख निर्माण करत श्याम यांनी प्रत्येकाच्या मनात आपली एक जागा निर्माण केली आहे. हजरजबाबीपणा, अचूक टायमिंग व वेगवान संवादफेक श्यामच्या अभिनयाची बलस्थाने आहेत.
श्याम राजपूत यांनी आजवर मालिका, चित्रपटांत काम केले आहे. तसेच सहाय्यक दिग्दर्शक म्हणूनही त्यांनी काम केले आहे. पण श्याम राजपूत यांना त्यांच्या कुटुंबापासून व लहान मुलापासून लांब राहून ही कामे करत प्रेक्षकांचे मनोरंजन करावे लागत आहे. नुकतंच ‘इट्स मज्जा’च्या ‘मज्जाचा अड्डा’ या कार्यक्रमात त्यांच्या या संघर्षाविषयी सांगितले. यावेळी त्यांना तुम्ही सध्या तुमच्या मुलगा, पत्नी व कुटुंबापासून लांब आहात, तर तुम्ही कुटुंबाला कसा वेळ देता? असा प्रश्न विचारण्यात आला.
यावेळी श्याम राजपूत यांनी या प्रश्नाचे उत्तर देत असं म्हटलं की, “माझ्यासाठी शूटिंगचे वेळापत्रक खूपच व्यस्त आहे. कारण आमचं हास्यजत्रेचं शूटिंग खूप उशिरापर्यंत चालतं आणि छत्रपती संभाजी नगरला जाणारी शेवटची ट्रेन मला पकडता येत नाही. मग मला हास्यजत्रेमधील श्याम बांगर त्याच्या गाडीने कल्याणल सोडतो. मग मी कल्याणवरुण जे काही मिळेल. ते पकडून नाशिक (द्वारका)ला जातो. तिथून मग मी गाडीने छत्रपती संभाजी नगरला पोहोचतो. मग तिथे एक-दोन दिवस राहिल्यानंतर पुन्हा मुंबईला यावं लागतं”.
यापुढे ते असं म्हणाले की, “गावी पोहोचल्यानंतर भावाची दोन मुलं व माझा मुलगा अगदी गळ्यात येऊन पडतात. तेव्हा सगळं काही संपून जातं. प्रवासामुळे मी एवढा थकलेला असूनही त्यांच्या मिठीमुळे मी माझा सगळा त्रास व थकवा विसरून जातो. बऱ्याचदा मी इतका थकलेला असूनही बऱ्याचदा घरी न् जाता क्रिकेट खेळायला जातो. क्रिकेट खेळून झाल्यानंतर मग मी घरी जातो”.
दरम्यान, श्याम सुंदर राजपूत यांनी ‘महाराष्ट्राची हास्यजत्रा’च्या आधी अनेक विनोदी कार्यक्रमांमधून काम केले आहे. त्यांच्या ‘महाराष्ट्राची हास्यजत्रा’ या शोमधील अनेक भूमिका गाजत असून प्रेक्षकांनाही या भूमिका विशेष आवडतात.
