nimish kulkarni getting married : मराठी मनोरंजन विश्वात सध्या लगीनघाई सुरु असलेली पाहायला मिळत आहे. एकामागोमाग एक कलाकार मंडळी लग्नबंधनात अडकताना दिसत आहेत. काही दिवसांपूर्वीच अभिनेत्री कोमल कुंभार, अनुष्का पिंपुटकर, मेघन जाधव, स्वानंद केतकर ही कलाकार मंडळी लग्नबंधनात अडकली. तर ‘बिग बॉस मराठी’ फेम सूरज चव्हाणही लग्नबंधनात अडकला. त्याच्या लग्नाची धामधूम तुफान व्हायरल झाली. तर अनेक कलाकार मंडळी काही दिवसांतच लग्नबंधनात अडकणार आहेत. येत्या काही दिवसांतच आदेश बांदेकर आणि सुचित्रा बांदेकर यांचा लेक सोहम बांदेकर हा देखील पूजा बिरारीसह लग्नबंधनात अडकणार आहे.
काल सोशल मीडियावर पूजा व सोहमच्या हळदीची, संगीतची धामधूम पाहायला मिळाली. आज २ डिसेंबरला ही जोडी लग्नबंधनात अडकणार आहे. अशातच आता आणखी एक मराठी अभिनेता बोहल्यावर चढणार आहे. ‘महाराष्ट्राची हास्यजत्रा’ फेम निमिष कुलकर्णी लवकरच लग्नबंधनात अडकणार आहे. त्याची लगीनघाई सुरु झाल्याचे पाहायला मिळत आहे. अभिनेत्याच्या घरी त्याच्या लग्नापुर्वीच्या विधींना सुरुवात झाली आहे. आणि त्याच्या लग्नापुर्वीच्या विधींचे फोटो समोर आले आहेत.
डोक्यावर मुंडावळ्या बांधून विधी करतानाचा निमिषचा फोटो समोर आला आहे. यांत त्याने गुलाबी रंगाचे धोतर आणि शेला परिधान केला आहे. नवऱ्या मुलाच्या रूपात तो खूप राजबिंडा दिसत आहे. निमिषच्या मित्राने हा फोटो सोशल मीडियावर शेअर केला आणि येत्या चार दिवसांत त्यांचं लग्न होणार असल्याची बातमी दिली. निमिष अभिनेत्री कोमल भास्कर हिच्याशी लग्न करणार आहे.
निमिषने थेट फोटो शेअर करत साखरपुडा केला असल्याची गुडन्यूज चाहत्यांना दिली. २५ जुलै २०२५ रोजी निमिषने त्याच्या आयुष्यातील एका नव्या प्रवासाची सुरुवात केली. निमिष कुलकर्णीने कोमल भास्करसह साखरपुडा समारंभ उरकला. अभिनेत्याच्या साखरपुड्याचे अचानक समोर आलेले फोटो पाहून अनेकांना सुखद धक्का बसला. आता येत्या चार दिवसांत निमिष व कोमल लग्नबंधनात अडकणार आहेत.
