बॉलिवूडची धकधक गर्ल अशी ओळख असलेली अभिनेत्री म्हणजे माधुरी दीक्षित. माधुरीचं हिंदी सिनेसृष्टीत मोठं योगदान आहे. कधी मोहिनी, तर कधी चंद्रमुखी, तर कधी बेगम पारा बनून तिने तिच्या प्रत्येक भूमिकेतून छाप पाडत प्रेक्षकांच्या मनात घर केलं आहे. आजही लोक माधुरीच्या अदांचे, तिच्या सौंदर्याचे तसेच तिच्या अभिनयाचे चाहते आहेत. माधुरीचा खूप मोठा चाहतावर्ग आहे. अभिनयासह माधुरी दीक्षित उत्तम नृत्यांगना म्हणूनही प्रसिद्ध आहे. (Madhuri Dixit And Shriram Nene)
माधुरी सोशल मीडियावर बऱ्यापैकी सक्रिय असते. सोशल मीडियाच्या माध्यमातून ती चाहत्यांच्या संपर्कात राहत असते. काही दिवसांपासून माधुरीच्या नव्या चित्रपटामुळे ती चर्चेत असलेली पाहायला मिळाली. माधुरीने तिचे पती डॉ. श्रीराम नेने यांच्यासह मिळून ‘पंचक’ या नव्या सिनेमाची निर्मिती केली आहे. नुकताच या चित्रपटाचा ट्रेलर लॉंच सोहळा दणक्यात पार पडला. या ट्रेलर लॉंच सोहळयाला माधुरीसह तिचे पती डॉ. श्रीराम नेने यांनीही हजेरी लावली होती.
चित्रपटाच्या ट्रेलर लॉंच सोहळ्याला माधुरीसह तिचे पती डॉ. नेने यांनीही संवाद साधला. माधुरीला अनेकदा मराठीत बोलताना ऐकलं आहे पण डॉ. नेनेंना मराठीमध्ये बोलताना ऐकलेलं नाही. अशातच माधुरी व डॉ. नेने यांचा एक व्हिडीओ समोर आला आहे, ज्यामध्ये ते मराठीत बोलताना दिसत आहेत. यावेळी त्यांनी त्यांच्या ‘पंचक’ चित्रपटाबद्दल मराठीत माहिती दिली. “माझं मराठी यांच्यासारखं नाही, पण या चित्रपटाचा विनोद वेगळ्याच उंचीवर नेणारा आहे आणि हा चित्रपट सगळी नाती उत्तम दर्शवतो,” असं ते व्हिडीओत बोलताना दिसत आहेत.
सोशल मीडियावर व्हायरल झालेल्या या व्हिडीओवर अनेक चाहत्यांनी डॉ. श्रीराम नेने यांच्या मराठीचं कौतुक केलं आहे. काही चाहत्यांनी त्यांना त्यांच्या नवीन चित्रपटासाठी शुभेच्छाही दिल्या आहेत. या चित्रपटात आदिनाथ कोठारे, तेजश्री प्रधान, आनंद इंगळे, नंदिता पाटकर, भारती आचरेकर, विद्याधर जोशी, सतीश आळेकर, सागर तळाशीकर, संपदा जोगळेकर, दिलीप प्रभावळकर, दीप्ती देवी हे कलाकार झळकणार असल्याचं समोर आलं आहे.
