‘दुर्वा’, ‘राधा ही बावरी’, ‘असंभव’, ‘कशाला उद्याची बात’ अनेक लोकप्रिय मालिकांमधून आणि ‘बावरे प्रेम हे’, ‘तप्तपदी’, ‘आरंभ’, ‘क्षण हा मोहाचा’ आदी चित्रपटांमधून प्रेक्षकांच्या भेटीला आलेल्या दिवंगत अभिनेत्री म्हणजे अश्विनी एकबोटे. अभिनयाबरोबच त्या एक उत्तम नृत्यांगनाही होत्या. भरतनाट्यम नृत्यांगणा अश्विनी एकबोटे यांचं २२ ऑक्टोबर २०१६ रोजी निधन झालं. पुण्यातील भरत नाट्यमंदिर येथे ‘नाट्य त्रिविधा’ या कार्यक्रमात नृत्य सादर करत असताना अश्विनी एकबोटे रंगमंचावर कोसळल्या. हृदयविकारच्या झटक्याने त्यांचं वयाच्या ४४व्या वर्षी निधन झालं आणि आज त्यांची पुण्यतिथी आहे. त्यांचे अनेक चाहते त्यांची आजही आठवण काढतात. अशातच आज अश्विनी यांच्या पुण्यतिथीनिमित्त त्यांची सून व अभिनेत्री अमृता बनेने आपल्या सासूसाठी भावुक पोस्ट लिहिली आहे. (Ashwini Ekbote Death Anniversary)
अमृताने अश्विनी यांच्या फोटोबरोबरचा एक फोटो पोस्ट केला आहे आणि या पोस्टमध्ये असं म्हटलं आहे की, “प्रिय आशुआई, आजचा दिवस कॅलेंडरमधून काढून टाकता तर नाही येणार पण तुझी आठवण? त्याचं काय? एका दिवसापूर्ती नाही ती… खरं तर तुला कधी भेटता नाही आलं, तुझ्याशी बोलता नाही आलं, तुझं नृत्य म्हणजे तुझा श्वास कधी प्रत्यक्ष पाहता नाही आला. याची माझ्या मनात कायम खंत कायम राहील. तुला माहित आहे, आज जिथे तू वावरलीस, तिथे म्हणजे आपल्या घरी जेव्हा जेव्हा मी असते तेव्हा अस वाटतं आशुआईने ह्याच कपाटाला हात लावला असेल ना?, याच स्वयंपाकघरात अन्नपुर्णेसारखा सगळ्यांचा पोटोबा शांत केला असेल?, याच जिन्यावरून फोटोज काढले असतील. आज त्या प्रत्येक निर्जीव गोष्टीला हाताळताना तू त्याच्यात जो जीव ओतून गेली आहेस त्यामुळे का होईना मला तुला भेटता येतं, तुझ्याशी बोलता येतं”.
यापुढे अमृताने असं म्हटलं आहे की, “तुला माहित आहे, लग्नाच्या आधी म्हणजे गेल्या दिवाळीला मी अंधेरीला छान रांगोळी काढली होती, त्यावर शेजारच्या काकू म्हणाल्या, “अरे वाह, आज तुला शुटींगला सुट्टी आणि त्यात सुंदर रांगोळी काढली आहेस! मग आता व्हिडीओ कॉल करुन दाखवशील ना तुझ्या सासूबाईंना?.” ठिकेऽऽऽऽऽ. मला माहीत आहे ती तात्पुरती रांगोळी तुला दाखवता नाही आली. पण शुभंकर आणि मी मिळून आयुष्यभरासाठी जी कायमस्वरूपी संसाराची रांगोळी काढायला घेतली आहे ती नक्कीच तू पाहत आहेस आणि कुठे कुठले रंग भरायचे हेसुद्धा सांगत आहेस”.
यापुढे अमृताने यात असं म्हटलं आहे की, “रोज रात्री बाबा, शुभंकर आणि माझा व्हिडीओ कॉल होतो तेव्हा स्क्रीनवरचा तुझा चौकोन व्हॉट्सपवर नाही तर आमच्या मनात आहे आणि या व्हिडीओ कॉलला नेहमीच रेंज असेल आणि हो तुझा नादिष्ट शुभंकर एकबोटे सगळं छान सांभाळून घेत आहे. बाबाही कुठलीही परिस्थिती असो सगळं सोपं करुन टाकतात. जिथे आहेस तिथे छान रहा आणि हो तिथे तरी स्वतःची दगदग करुन घेऊ नको. तुला खूप सारं प्रेम आणि गोड पापा”.
अमृताच्या या पोस्टखाली अविनाश नारकरांनीही कमेंट करत असं म्हटलं आहे की, “व्वा अमृता… अगं किती छान… किती गोड व्यक्त केलयंस स्वतःला बाळा..!! अशीच एकरूप… त्या घरात एकजीव होऊन रहा. अश्विनीसारख्या पुण्यात्म्याचं व्यक्तित्व, कार्यकर्तृत्त्व, तुझ्यात कणाकणाने झिरपूदे, म्हणजे तिच्या न विसरता येणाऱ्या स्मृति तुझ्या रूपाने सगळ्यांबरोबर राहतील. विनम्र अभिवादन”.
